الەم جاڭالىقتارىجاڭالىقتار
3 جىلداعى رەكورد: سوڭعى ءبىر ايدا قازاقستانعا 150 قىتايلىق كومپانيا جۇمىس ىستەۋگە كەلدى
فوتو: inbusiness.kz
2023 جىلدىڭ قاراشاسىندا قازاقستانعا كەلۋشى قىتايلىق كومپانيالاردىڭ سانى قىسقارعان. ال بيىل ءوسىم ەرەكشە قارقىنمەن ارتۋدا, – دەپ حابارلايدى qandastar.kz
بارلىق تىركەلگەن ۇيىمداردىڭ ۇشتەن ەكىسى عانا جۇمىس ىستەپ تۇر, ول 3062 بىرلىكتى قۇرايدى. ءبىرىنشى نەسيە بيۋروسىنىڭ حابارلاۋىنشا, سوڭعى ءبىر ايدا كومپانيالاردىڭ سانى 122-گە ءوستى. بىردە-ءبىر سەرىكتەس ەل تامىز ايىندا مۇنداي ناتيجە كورسەتپەگەن.
بۇعان دەيىن قاسىم-جومارت توقاەۆ بىلتىر قازاقستان ەكونوميكاسىنا قۇيىلعان قىتاي ينۆەستيتسياسىنىڭ كولەمى 16 پايىزعا ءوسىپ, 1,8 ميلليارد دوللارعا جەتكەنىن اتاپ وتكەن بولاتىن.
– بۇگىندە قۇنى 14,5 ميلليارد دوللار بولاتىن 45 جوبا جۇزەگە اسىرىلىپ جاتىر. جالپى قىتاي كاپيتالىنىڭ ۇلەسى بار كاسىپورىندار سانى 4700-دەن اسادى. ءبىز ءوزارا ءتيىمدى ينۆەستيتسيالىق جوبالاردى ودان ءارى جۇزەگە اسىرۋدىڭ ماڭىزىن اتاپ وتتىك. ناقتىراق ايتقاندا, ەنەرگەتيكا, ينفراقۇرىلىم, اۋىل شارۋاشىلىعى, ءوندىرىس, قارجى, كولىك, اەروعارىش ونەركاسىبى جانە IT سالالارىنا توقتالدىق. قازاقستان ءوز نارىعىنا كىرۋگە نيەتتى قىتاي كومپانيالارى ءۇشىن قولايلى جاعداي جاساۋعا دايىن, – دەدى قازاقستان پرەزيدەنتى.
قاسىم-جومارت توقاەۆ قولعا الىنعان اۋقىمدى ەنەرگەتيكالىق جوبالاردى ءتيىمدى جۇزەگە اسىرۋ قاجەت دەپ سانايدى.
– قازىر قازاقستاندا مۇناي-حيميا زاۋىتتارى سالىنىپ جاتىر. شىمكەنتتەگى مۇناي وندەۋ زاۋىتىن جاڭعىرتۋ جۇمىستارى جۇرگىزىلۋدە. «قازاقستان – قىتاي» مۇناي قۇبىرىنىڭ وتكىزۋ مۇمكىندىگىن ۇلعايتۋ شارالارى قولعا الىندى. كوپ ۇزاماي بۇل جوبالار ەكونوميكامىزعا ۇلەس قوسا باستايدى. ساپار اياسىندا قازاق-قىتاي ىسكەرلىك كەڭەسىنىڭ وتىرىسى ءوتتى. وندا بىرقاتار ينۆەستيتسيالىق كەلىسىمدەرگە قول قويدىق, – دەدى قاسىم-جومارت توقاەۆ.
