مادەنيەت
«30 جىل ءجۇردىم»: اينۇر تۇرسىنباەۆا كورگەن ءتۇسى ومىردە ورىندالعانىن ايتتى
فوتو: اشىق دەرەككوز
بەلگىلى ايتىسكەر اقىن اينۇر تۇرسىنباەۆا كورگەن تۇستەرى وڭىندە ورىندالعانى تۋرالى ايتىپ بەردى, – دەپ حابارلايدى qandastar.kz turkystan.kz-كە سىلتەمە جاساپ.
«ايتىس ساحناسىندا 30 جىل ءجۇردىم. بىراق ءتۇستى سيرەك كورەمىن… ەسىمدە قالعان 3-4 ءتۇسىمدى ايتىپ بەرەيىن… وسىدان 25 جىلداي ۋاقىت بۇرىن بالقاشقا ايتىسقا شاقىرىلدىم… قاتەلەسپەسەم, اعىباي باتىردىڭ 200 جىلدىق تويى ءوتتى. جولدا پويىزدا كەتىپ بارا جاتىپ ءتۇس كوردىم. تۇسىمدە بىرەۋ ماعان التىن سىرعانىڭ ءبىر جاعىن عانا سىيلاپ جاتىر. «مەن مۇنىڭ جالعىز ءوزىن تاعا المايمىن عوي, مۇنى نە ىستەسەم ەكەن» دەپ ويلانىپ جاتىپ ويانىپ كەتىپپىن. سول ايتىستا باس جۇلدەنى امانجول ءالتاي اعاعا ءبولىستىم. ياعني ءبىر ماشينانى ەكەۋمىزگە اقشالاي ءبولىپ بەردى.
ءبىر كۇنى تۇسىمدە ءبىر قۇربىمدى كورەمىن. مەنىڭ التىندارىمدى تاعىپ الىپتى.. بىراق مەن قۋانىپ تۇرمىن..
مەندە باسقاسى بار عوي دەگەن بولارمىن, بىلمەيمىن. شىندىعىندا ول ۋاقىتتاردا كوپ التىنىم جوق ەدى. ءسال ۋاقىتتان سوڭ سوزاققا ايتىسقا شاقىرتۋ الدىم. باردىم, ايتىستىم. باس جۇلدە اپپاق جيگۋليدى ۇتىپ الدىم. نەگىزى سول اۋىلدىڭ بالاسى قاليجان دا كەرەمەت ايتىسقان, بىراق مەنى الىستان كەلگەن قوناق دەپ سىيلاعان بولۋ كەرەك, حالىق كەرەمەت قوشەمەتتەپ كولىكتى ماعان بەردى. مەن قاليجانعا بەرىپ كەتتىم.. بەرگەنىمە قاتتى قۋاندىم…
بىردە قارماقشىعا ايتىسقا باردىم… سول قارماقشىنىڭ حالقىنىڭ قوشەمەتى ءالى ەسىمدە. بىراق ءبىزدى جاتاقحاناعا جاتقىزدى. دارەتحانا دالادا, بولمە قاپىرىق دەگەندەي مازامىز قاشتى.. سول جەردە ءتۇس كوردىم. تۇسىمدە كوشەدەن التىن جۇزىك تاۋىپ الىپپىن, تاعىپ كورسەم تۇپ-تۋرا. سول ايتىسقا تىگىلگەن اپپاق ماشينانى ءمىنىپ كەتتىم…», – دەپ جازدى ايتىسكەر اقىن.
