«30 jyl júrdim»: Aınur Tursynbaeva kórgen túsi ómirde oryndalǵanyn aıtty

Foto: ashyq derekkóz

Belgili aıtysker aqyn Aınur Tursynbaeva kórgen tústeri óńinde oryndalǵany týraly aıtyp berdi, – dep habarlaıdy qandastar.kz turkystan.kz-ke silteme jasap.

«Aıtys sahnasynda 30 jyl júrdim. Biraq tústi sırek kóremin… Esimde qalǵan 3-4 túsimdi aıtyp bereıin… Osydan 25 jyldaı ýaqyt buryn Balqashqa aıtysqa shaqyryldym… Qatelespesem, Aǵybaı batyrdyń 200 jyldyq toıy ótti. Jolda poıyzda ketip bara jatyp tús kórdim. Túsimde bireý maǵan altyn syrǵanyń bir jaǵyn ǵana syılap jatyr. «Men munyń jalǵyz ózin taǵa almaımyn ǵoı, muny ne istesem eken» dep oılanyp jatyp oıanyp ketippin. Sol aıtysta bas júldeni Amanjol Áltaı aǵaǵa bólistim. Iaǵnı bir mashınany ekeýmizge aqshalaı bólip berdi.

Bir kúni túsimde bir qurbymdy kóremin. Meniń altyndarymdy taǵyp alypty.. Biraq men qýanyp turmyn..

Mende basqasy bar ǵoı degen bolarmyn, bilmeımin. Shyndyǵynda ol ýaqyttarda kóp altynym joq edi. Sál ýaqyttan soń Sozaqqa aıtysqa shaqyrtý aldym. Bardym, aıtystym. Bas júlde appaq Jıgýlıdi utyp aldym. Negizi sol aýyldyń balasy Qalıjan da keremet aıtysqan, biraq meni alystan kelgen qonaq dep syılaǵan bolý kerek, halyq keremet qoshemettep kólikti maǵan berdi. Men Qalıjanǵa berip kettim.. Bergenime qatty qýandym…

Birde Qarmaqshyǵa aıtysqa bardym… Sol Qarmaqshynyń halqynyń qoshemeti áli esimde. Biraq bizdi jataqhanaǵa jatqyzdy. Dárethana dalada, bólme qapyryq degendeı mazamyz qashty.. Sol jerde tús kórdim. Túsimde kósheden altyn júzik taýyp alyppyn, taǵyp kórsem tup-týra. Sol aıtysqa tigilgen áppaq mashınany minip kettim…», – dep jazdy aıtysker aqyn.