جاڭالىقتار
«300 مەتردەن اسادى»: قازاقستان مەن وزبەكستان شەكاراسىندا جاسىرىن جەر استى جولى تابىلدى
وزبەكستان-قازاقستان شەكاراسىندا 310 مەترلىك جەر استى كونترابانداعا ارنالعان جەر استى جولى انىقتالدى. تۇنەل ارقىلى ساپاسىنا كەپىلدىگى جوق ءدارى-دارمەكتەر تاسىمالدانعان,-دەپ حابارلايدى Qandastar.kz
باسىلىمنىڭ مالىمەتىنشە, مەملەكەتتىك كۇزەت قىزمەتىنىڭ قىزمەتكەرلەرى شەكارا قىزمەتى جانە «تاشكەنت-اەرو» مامانداندىرىلعان كەدەن كەشەنىنىڭ قىزمەتكەرلەرىمەن بىرلەسىپ, ەسىرتكى زاتتارىن زاڭسىز اكەلۋمەن اينالىسقان ترانسشەكارالىق قىلمىستىق توپتىڭ ارەكەتىن اشكەرەلەدى.
ءۇندىستاننان قازاقستان ارقىلى وزبەكستانعا كەپىلدىگى جوق ءدارى-دارمەك جەتكىزىلگەن. «دەلي – تاشكەنت – الماتى» رەيسى بويىنشا ءدارى-دارمەك پارتياسى جەتكىزىلگەنى, ودان كەيىن ول تۋننەل ارقىلى قازاقستاننىڭ تۇركىستان وبلىسىنىڭ سارىاعاش اۋدانىنان تاشكەنت وبلىسىنىڭ تاشكەنت اۋدانىنا جەتكىزىلگەنى انىقتالعان. تەكسەرۋ قورىتىندىسى بويىنشا ءتارتىپ ساقشىلارى قىلمىستىق توپ مۇشەلەرىنەن ايعاق زات رەتىندە ءۇندىستاندا وندىرىلگەن البۋمين, رەمدەسيۆير, مەروپەنەم سياقتى 107 اتاۋداعى 17 048 ەسىرتكى پرەپاراتىن تاركىلەدى.
ۇزىندىعى 310 مەتردى قۇرايتىن اشىلعان تۋننەلدە جەلدەتۋ جۇيەسى ورناتىلعان, كونترابانداشىلار جۇك تاسىمالداۋ ءۇشىن اربالاردى پايدالانعان. اتالعان فاكت بويىنشا قىلمىستىق ءىس قوزعالىپ, كۇدىكتىلەر ۋاقىتشا ۇستاۋ يزولياتورىنا قامالدى.
ناۋرىزدا قىرعىزستان مەن وزبەكستان شەكاراسىندا كونترابانداشىلاردىڭ جەراستى جولى تابىلعانىن جازدىق. ول تاۋارلار مەن ادامداردى زاڭسىز وتكىزۋ ءۇشىن پايدالانىلعان ەدى.
