300 ميلليون تەڭگە جىمقىرىلعان: اتباسار شەنەۋنىكتەرى سوتتالدى

اقمولا وبلىسىندا سۋ تاسقىنى قاۋپى بار ايماقتا تۇراتىن تۇرعىنداردى كوشىرۋگە بولىنگەن 300 ميلليون تەڭگەدەن استام قارجىنى جىمقىرعاندار سوتتالدى, دەپ حابارلايدى Qandastar.kz اقپارات پورتالى.

بۇل تۋرالى وبلىستىق پروكۋراتۋرا مالىمدەدى.

ءىس ماتەريالدارىنا سۇيەنسەك, 2021 جىلى ۇكىمەت رەزەرۆىنەن اتباسار اۋدانىنىڭ 200 وتباسىن كوشىرۋ ءۇشىن ەكى كوپقاباتتى تۇرعىن ءۇي سالۋعا قارجى بولىنگەن. الايدا اتالعان جوبانى جۇزەگە اسىرۋ كەزىندە قۇرىلىس ءبولىمى باسشىلارى مەن “پرەستيج ستروي 7” جانە “فۋندامەنتال” جاۋاپكەرشىلىگى شەكتەۋلى سەرىكتەستىكتەرىنىڭ وكىلدەرى قىلمىستىق سحەما ۇيىمداستىرىپ, قاراجاتتى قولدى ەتكەن.

2024 جىلدىڭ قاراشاسىندا پروكۋراتۋرا تەرگەۋدى اياقتاپ, ءىستى سوتقا جولداعان. ناتيجەسىندە سوت كۇدىكتىلەردى كىنالى دەپ تاۋىپ, ولاردىڭ ءبىرىن – 8 جىل 6 ايعا, ەكىنشىسىن – 7 جىل 6 ايعا باس بوستاندىعىنان ايىردى.

سوت ۇكىمى قىلمىستىق كودەكستىڭ 180-بابىنىڭ 4-بولىگى — «وتە ءىرى كولەمدە ۇرلاۋ» جانە 218-بابى — «قىلمىستىق جولمەن الىنعان م ۇلىكتى زاڭداستىرۋ» باپتارى بويىنشا شىعارىلدى.

ايتا كەتەيىك, سوت ۇكىمى ءالى زاڭدى كۇشىنە ەنگەن جوق.