جاڭالىقتار
31 ارنا مەن informburo.kz وتەمۇراتوۆتىڭ ۋىسىنان شىقتى
فوتو: اشىق دەرەككوز
قۇرامىندا 31 ارنا مەن informburo.kz سايتى بولعان «31» مەدياحولدينگتىڭ قۇرىلتايشىسى اۋىستى, دەپ حابارلايدى Qandastar.kz. بۇعان دەيىن ول كاسىپكەر بولات وتەمۇراتوۆقا تيەسىلى بولعان.
Egov-تا كورسەتىلگەندەي, كومپانيا 25 قىركۇيەك كۇنى قايتا تىركەۋدەن وتكەن. تەلەكومپانيانىڭ قازىرگى قۇرىلتايشىسى – «ادىلدىك جانە وركەندەۋ» قورى رەتىندە كورسەتىلگەن قور. ول 2022 جىلى قۇرىلعان. ال قوردىڭ قۇرىلتايشىسى – ءار جىلدارى «31 ارنا», «الماتى» مەن «قازاقستان» رەسپۋبليكالىق تەلەراديوكورپوراتسياسىن باسقارعان نۇرجان مۇحامەدجانوۆا مەن گۇلجان مارقاباەۆا دەپ كورسەتىلگەن. ولار قازىر قۇجاتتا اتالعان قوردىڭ ءباسپاسوز حاتشىسى رەتىندە كورسەتىلگەن.
قوردىڭ باس ديرەكتورى – جۋرناليست دانا رىسمۇحامەدوۆا. ول 2013 جىلدارى بۇرىنعى «نۇر وتان» پارتياسىنىڭ اقپاراتتىق كوميتەتەتىنىڭ باسشىسى قىزمەتىن اتقارعان.
«ادىلدىك جانە وركەندەۋ» ۇيىمىنىڭ سايتىندا قور ءار سالاداعى بەلسەندى ازاماتتاردىڭ باستاماسىمەن قۇرىلعانى جازىلادى.
«قوعامدىق قور ەلدىڭ بارلىق وڭىرىنەن جينالعان بەلسەندى ازاماتتاردىڭ باستاماسىمەن قۇرىلدى. ءبىزدىڭ ارامىزدا – ونەركاسىپ كاسىپورىندارىنىڭ جۇمىسكەرلەرى, فەرمەرلەر, كەنشىلەر, قۇتقارۋشىلار, دارىگەرلەر, مۇعالىمدەر مەن جۋرناليستەر, ءتۇرلى ۇەۇ وكىلدەرى بار. ءبىز ءوز كۇشىمىزدى, جيناعان تاجىريبەمىز بەن مۇمكىندىكتەرىمىزدى ءاربىر وتانداسىمىزدىڭ ادىلەتتى قازاقستاندى شىنايى سەزىنۋىنە جۇمساعىمىز كەلەدى», – دەلىنگەن وندا.
قوردىڭ ماقساتى – «پرەزيدەنت قاسىم-جومارت توقاەۆ باستاعان ادىلەتتى قازاقستاندى قۇرۋ جولىنداعى رەفورمالارعا ءوز ۇلەسىن قوسۋعا ىنتالى, بەلسەندى ازاماتتىق ۇستانىمى بار قازاقستاندىقتاردى بىرىكتىرۋ».
«31» مەدياحولدينگ بۇعان دەيىن بولات وتەمۇراتوۆتىڭ اكتيۆتەرىن باسقاراتىن «ۆەرنىي كاپيتال» كومپانيالار توبىنا تيەسىلى بولعان.
