الەۋمەت جانە قوعام
ءمينيستردىڭ جاۋابى: ءدارى-دارمەك ارزانداي ما?
فوتو: parlam.kz
مەملەكەت باسشىسىنىڭ 2024 جىلعى جولداۋىن جانە وزگە دە تاپسىرمالارىن جۇزەگە اسىرۋ شەڭبەرىندە ۇكىمەت دەنساۋلىق ساقتاۋ جۇيەسى ءۇشىن كادرلار دايارلاۋ, سونداي-اق حالىقتى قولجەتىمدى جانە ساپالى دارىلىك زاتتارمەن قامتاماسىز ەتۋ جونىندە شارالار قابىلداۋدا, دەپ جازدى qandastar.kz
«ادامي كاپيتالدى دامىتۋ باعىتىندا مەديتسينالىق ءبىلىم بەرۋدى كۇشەيتىپ, ناۋقاستاردى دەربەس قابىلداۋعا باسىمدىق بەرە وتىرىپ, مەيىرگەرلىك تاجىريبەنى دامىتامىز. ۇزدىكسىز كاسىبي دامۋ سيمۋلياتسيالىق ورتالىقتارى مەن قاشىقتان وقىتۋ پلافورمالارى ارقىلى ەنگىزەمىز»,
– دەپ اتاپ ءوتتى اقمارال ءالنازاروۆا. ەلىمىزدە «پەدياتريا» ماماندىعى قايتا ەنگىزىلىپ, وتە تاپشى 14 بالالاردى ەمدەۋ ماماندىعى بويىنشا رەزيدەنتۋرا اشىلدى. مامانداردى اۋىلدىق جەرلەرگە تارتۋ ماقساتىندا اسا قاجەتتى ماماندىق يەلەرىنە 8,5 ملن تەڭگە كولەمىندە كوتەرمەاقى تولەنە باستادى.
«مەملەكەت باسشىسىنىڭ تاپسىرماسى بويىنشا قوسىمشا الەۋمەتتىك قارجىلاي كومەك قاراستىرىلعان. كادر تاپشىلىعىن ازايتۋ ماقساتىندا اۋىلدىق ەلدى مەكەندەرگە جۇمىسقا كەلگەن اسا تاپشى ماماندىقتار دارىگەرلەرگە 8,5 ميلليون تەڭگە كولەمىندە تولەم قاراستىرىلعان»,
– دەدى اقمارال ءالنازاروۆا. فارماتسەۆتيكا سالاسىندا 2029 جىلعا دەيىن وتاندىق ءدارى-دارمەك ءوندىرىسى ۇلەسىن 50%-عا جەتكىزۋ جونىندەگى تاپسىرمانى ورىنداۋ بويىنشا شارالار قابىلدانۋدا. باعا قالىپتاستىرۋدىڭ اشىقتىعىن ارتتىرۋ ماقساتىندا شەكتى باعالاردى بەلگىلەۋ تەتىگى قايتا قارالدى: ارتىق شىعىندار الىنىپ تاستالىپ, دجەنەريكتەر باعاسى 30%-عا دەيىن تومەندەتىلدى. رەفەرەنتتىك باعا بەلگىلەۋدىڭ جاڭا مودەلىن ەنگىزۋ ءدارى-دارمەك قۇنىن 12%-عا تومەندەتۋگە مۇمكىندىك بەرىپ وتىر, ال جالپى ەكونوميكالىق تيىمدىلىك شامامەن 50 ملرد تەڭگەنى قۇرادى.
