33 جاستاعى شەنەۋنىك تۇركىستان قالاسىنىڭ اكىمى بولىپ تاعايىندالدى

فوتو:  gov.kz

جاڭا اكىمدى قالانىڭ اكتيۆىنە وبلىس اكىمى دارحان ساتىبالدى تانىستىردى. قالالىق ءماسليحات دەپۋتاتتارى قالا اكىمى لاۋازىمىنا ۇسىنىلعان ازىمبەك پازىلبەك ۇلىنىڭ كانديداتۋراسىن قولداپ, داۋىس بەردى, – دەپ جازادى qandastar.kz قالا اكىمدىگىنىڭ اقپاراتىنا سۇيەنىپ. 

تۇركىستان وبلىسىنىڭ اكىمى دارحان ساتىبالدى شاھاردىڭ جاڭا باسشىسىنا تۇركىستان قالاسىن دامىتۋ, تۇركى الەمىنىڭ ورتالىعىنا اينالدىرۋ, تۋريستىك جانە ەكونوميكالىق الەۋەتىن كوتەرۋ باعىتىندا ماڭىزدى مىندەتتەر جۇكتەلىپ وتىرعانىن ايتىپ, الداعى جۇمىسىنا ساتتىلىك تىلەدى.

ازىمبەك پازىلبەك ۇلى 1991 جىلى قىزىلوردا وبلىسى, جاڭاقورعان اۋدانىندا دۇنيەگە كەلگەن. ءبىلىمى – جوعارى. ءال-فارابي اتىنداعى قازاق ۇلتتىق ۋنيۆەرسيتەتى, قورقىت اتا اتىنداعى قىزىلوردا مەملەكەتتىك ۋنيۆەرسيتەتىن, م.س.نارىكباەۆ اتىنداعى قازاق مەملەكەتتىك زاڭ ۋنيۆەرسيتەتىن جانە «بولاشاق» ۋنيۆەرسيتەتىن بىتىرگەن. ماماندىقتارى – مەملەكەتتىك جانە جەرگىلىكتى باسقارۋ, ەكونوميكا, قۇرىلىس, قۇقىقتانۋ.

ەڭبەك جولىن 2013 جىلى قىزىلوردا قالالىق ىشكى ساياسات ءبولىمى جەتەكشى مامانىنىڭ مىندەتىن اتقارۋشى بولىپ باستاپ, جەتەكشى مامان, باس مامان قىزمەتتەرىن اتقارعان. 2015 جىلى قىزىلوردا قالاسىنىڭ اكىمى اپپاراتى ۇيىمداستىرۋ-ينسپەكتورلىق ءبولىمىنىڭ باس ينسپەكتورى بولسا, ودان كەيىن قازاقستان رەسپۋبليكاسى ۇلتتىق ەكونوميكا مينيسترلىگىنىڭ قۇرىلىس, تۇرعىن ءۇي-كوممۋنالدىق شارۋاشىلىق ىستەرى جانە جەر رەسۋرستارىن باسقارۋ كوميتەتىنىڭ كوممۋنالدىق شارۋاشىلىق باسقارماسىنىڭ ساراپشىسى, باس ساراپشىسى بولىپ ەڭبەك ەتكەن.

2017 جىلدان باستاپ قازاقستان رەسپۋبليكاسى ينۆەستيتسيالار جانە دامۋ مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى كوممۋنالدىق شارۋاشىلىق باسقارماسىنىڭ باس ساراپشىسى, باسشىسى بولىپ جۇمىس ىستەگەن. قازاقستان رەسپۋبليكاسى ينۆەستيتسيالار جانە دامۋ مينيسترلىگى مەن قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگىنىڭ باسقارمالارىن باسقارعان.

قازاقستان رەسپۋبليكاسى يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسىنىڭ ورىنباسارى, قازاقستان رەسپۋبليكاسى ونەركاسىپ جانە قۇرىلىس مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسىنىڭ ورىنباسارى لاۋازىمدارىن اتقارعان.