جاڭالىقتار
«350 ەر ازامات شاقىرىلعان»: الماتىدا يمام تەك ەركەكتەردى جيناپ توي جاساعان
الماتىدا بۇرىن قازاقستان مۇسىلماندارى ءدىني باسقارماسىنىڭ (قمدب) باس ءمۇفتيى قىزمەتىن اتقارعان سانسىزباي قۇربان ۇلىنىڭ قىزىنىڭ ۇزاتۋ تويى ءوتتى, دەپ حابارلايدى Qandastar.kz.
سالتاناتتى شاراعا 350-گە جۋىق ەر ادام قاتىستى. قوناقتار قاتارىندا زيالى قاۋىم وكىلدەرى, ءدىن قايراتكەرلەرى مەن قوعام بەلسەندىلەرى بولدى. ۇيىمداستىرۋشىلاردىڭ ايتۋىنشا, توي شاريعات تالاپتارىنا ساي وتكىزىلگەن.
جيىندا اقساقالدار جاس وتاۋعا باتا بەرىپ, ىزگى تىلەكتەرىن جەتكىزدى.
الايدا الەۋمەتتىك جەلىلەردە وتكەن تويعا قاتىستى ءتۇرلى پىكىر ايتىلدى. كەيبىر قازاقستاندىقتار قىز ۇزاتۋ ءداستۇرلى تۇردە ايەلدەر مەن ەرلەردىڭ بىرگە قاتىسۋىمەن وتەتىنىن ەسكەرىپ, مۇنداي فورماتتىڭ قازاقى سالت-داستۇرگە جات ەكەنىن العا تارتتى.
«قىزدى اناسى, اپكەلەرى, جەڭگەلەرى شىعارىپ سالۋى ءتيىس ەدى, بۇل — قازاققا جات», – دەگەن پىكىرلەر جازىلدى.
سونىمەن بىرگە, باسقا ءبىر بولىگى شارانى شاريعات تالاپتارىنا ساي وتكىزىلگەنىنە وڭ باعاسىن بەرىپ, ءار وتباسىنىڭ تويدى ۇيىمداستىرۋدا ءوز تاڭداۋ قۇقىعى بار ەكەنىن اتاپ ءوتتى.
