جاڭالىقتار
«4 ادام قىزىمدى زورلىقپەن ءولتىرىپ, بالكوننان لاقتىرىپ جىبەرگەن» – اجاردىڭ اناسى كۇتپەگەن مالىمدەمە جاسادى
فوتو: سكرين
الماتى وبلىسىندا 6-قاباتتان قۇلاپ, مەرت بولعان اجار تاۋەكەلقىزىنىڭ تۋىستارى ادىلدىكتى تالاپ ەتەدى. ولار قايعىلى وقيعا بولعان كۇنى پاتەردىڭ ىشىندە توبەلەس بولىپ, قان ىزدەرى بولعانىن ايتتى, دەپ حابارلايدى qandastar.kz الماتىداعى BAQ.KZ ءتىلشىسى.
20 جاستاعى كەلىنشەكتىڭ ولىمىنە قاتىستى مارقۇمنىڭ جاقىندارى تىڭ دەرەكتەرمەن ءبولىستى. ولاردىڭ ايتۋىنشا, قايعىلى وقيعا بولعان كۇنى جالدامالى پاتەردە ايقاي-شۋ, توبەلەس بولعان. كورشىلەرى وتباسى مۇشەلەرىنىڭ سول كۇنى شۋ شىعارعانىن راستاعان.
«ول بولمەدە ەكى نەمەسە ءۇش ادام بولعان. ولاردىڭ قاتىسى بولماي, ول ءوز-وزىنەن تەرەزەدەن سەكىرىپ كەتپەيدى عوي. بولمەدە قاننىڭ ءىزى بار, جەردە جاتقان ءتىس بار, “توبەلەس بولعان” دەيدى كورشىلەرى. قايعىلى وقيعا بولعان كۇنى بولمەدە ايقاي-شۋ, توبەلەس بولعانىن ايتتى. تەرگەۋشىلەر قاندى وقيعانى تەك سۋيتسيد دەپ قاراپ, قىزىمنىڭ كۇيەۋىنەن بولەك سول كۇنى پاتەردە بولعان تاعى ءۇش ادامنان جاۋاپ الماعان», – دەدى مارقۇمنىڭ اكەسى تاۋەكەل جەكەباي.
مارقۇم اجار تاۋەكەلقىزىنىڭ اناسى قايعىلى وقيعا بولعان كۇنى بولمەدە بىرنەشە ادامنىڭ بولعانىن, قىزدارىنىڭ دەنەسىنەن كوگەرگەن ىزدەردىڭ بار ەكەنىن ايتتى.
ول بۇل وقيعاعا كىنالى ادامداردىڭ جاۋاپقا تارتىلىپ, قىزىنىڭ ولىمىنە كىنالى ادامدار جازاسىن الىپ, 25 جىلعا دەيىن سوتتالۋىن تالاپ ەتتى.
«قىزىم قايعىلى وقيعا بولاتىن كۇننىڭ الدىندا “ەنەمنىڭ دوستارى ءبىزدىڭ ۇيگە تويلاتۋعا كەلە جاتىر ەكەن. نەگە ءوز ۇيلەرىندە ەمەس, ءبىزدىڭ ۇيگە كەلە جاتىر ماما”, — دەپ رەنىشىن ءبىلدىردى دا كەتىپ قالدى. 4 ادام قىزىمدى زورلىق-زومبىلىقپەن ءولتىرىپ, بالكوننان لاقتىرىپ جىبەرگەن. سەبەبى قىزىمنىڭ دەنەسىندەگى جاراقاتتاردى كوردىك. قولىندا كوگەرگەن ىزدەر بار. ونىڭ سۋرەتتەرى بىزدە ساقتاۋلى. ءوز-وزىنە قول سالدى دەگەنگە ءبىز سەنبەيمىز. قىزىمنىڭ ولىمىنە كىنالى ادامدار جازاسىن السىن, 25 جىلعا دەيىن سوتتاسىن. قىزىمدى قورلاپ ءولتىرىپ وتىر. تەرگەۋ ءادىل ءجۇرىپ جاتقان جوق», – دەدى مارقۇمنىڭ اناسى گۇلجان جاقىپ.
