«4 adam qyzymdy zorlyqpen óltirip, balkonnan laqtyryp jibergen» – Ajardyń anasy kútpegen málimdeme jasady

Foto: skrın

Almaty oblysynda 6-qabattan qulap, mert bolǵan Ajar Táýekelqyzynyń týystary ádildikti talap etedi. Olar qaıǵyly oqıǵa bolǵan kúni páterdiń ishinde tóbeles bolyp, qan izderi bolǵanyn aıtty, dep habarlaıdy qandastar.kz Almatydaǵy BAQ.KZ tilshisi.

20 jastaǵy kelinshektiń ólimine qatysty marqumnyń jaqyndary tyń derektermen bólisti. Olardyń aıtýynsha, qaıǵyly oqıǵa bolǵan kúni jaldamaly páterde aıqaı-shý, tóbeles bolǵan. Kórshileri otbasy músheleriniń sol kúni shý shyǵarǵanyn rastaǵan.

«Ol bólmede eki nemese úsh adam bolǵan. Olardyń qatysy bolmaı, ol óz-ózinen terezeden sekirip ketpeıdi ǵoı. Bólmede qannyń izi bar, jerde jatqan tis bar, “tóbeles bolǵan” deıdi kórshileri. Qaıǵyly oqıǵa bolǵan kúni bólmede aıqaı-shý, tóbeles bolǵanyn aıtty. Tergeýshiler qandy oqıǵany tek sýııd dep qarap, qyzymnyń kúıeýinen bólek sol kúni páterde bolǵan taǵy úsh adamnan jaýap almaǵan», – dedi marqumnyń ákesi Táýekel Jekebaı.

Marqum Ajar Táýekelqyzynyń anasy qaıǵyly oqıǵa bolǵan kúni bólmede birneshe adamnyń bolǵanyn, qyzdarynyń denesinen kógergen izderdiń bar ekenin aıtty.

Ol bul oqıǵaǵa kináli adamdardyń jaýapqa tartylyp, qyzynyń ólimine kináli adamdar jazasyn alyp, 25 jylǵa deıin sottalýyn talap etti.

«Qyzym qaıǵyly oqıǵa bolatyn kúnniń aldynda “Enemniń dostary bizdiń úıge toılatýǵa kele jatyr eken. Nege óz úılerinde emes, bizdiń úıge kele jatyr mama”, — dep renishin bildirdi da ketip qaldy. 4 adam qyzymdy zorlyq-zombylyqpen óltirip, balkonnan laqtyryp jibergen. Sebebi qyzymnyń denesindegi jaraqattardy kórdik. Qolynda kógergen izder bar. Onyń sýretteri bizde saqtaýly. О́z-ózine qol saldy degenge biz senbeımiz. Qyzymnyń ólimine kináli adamdar jazasyn alsyn, 25 jylǵa deıin sottasyn. Qyzymdy qorlap óltirip otyr. Tergeý ádil júrip jatqan joq», – dedi marqumnyń anasy Gúljan Jaqyp.