جاڭالىقتار
«4 اي بۇرىن قۇدا ءتۇسىپ, سىرعا سالعان»: سۆەتا ايتباەۆا قىزىنىڭ ۇزاتىلۋى تۋرالى ايتىپ بەردى
2025 جىلعى 1 تامىز كۇنى تانىمال ءانشى ديماش قۇدايبەرگەننىڭ قارىنداسى راۋشان قۇدايبەرگەن 24 جاسىندا ۇزاتىلدى. ارادا بىرنەشە كۇن وتكەن سوڭ, 7 تامىزدا راۋشاننىڭ اناسى, ءانشى سۆەتلانا ايتباەۆا جەلىدە ارنايى العىس ايتىپ, جازبا جاريالادى, دەپ حابارلايدى Qandastar.kz
ول قازاقستاندىقتارعا ريزاشىلىعىن ءبىلدىرىپ, بىلاي دەدى:
«ارداقتى اعايىن! بىرنەشە كۇننەن بەرى سىزدەردىڭ اقجارما تىلەكتەرىڭىزدى وقىپ, قۋانىپ وتىرمىز. ءبىزدىڭ وتباسىمىزعا دەگەن ءىلتيپاتتارىڭىز, ىقىلاس-پەيىلدەرىڭىز ءۇشىن ايتار العىسىمىز شەكسىز! بارشاڭىزدىڭ اماندىقتارىڭىزدى تىلەيمىز! ەكى باۋىرىنىڭ ورتاسىندا ەركەلەپ وسكەن راۋشانتايىمىزدىڭ دا ۇياسىنان ۇشار ءساتى جەتىپتى. اتا-اجەسىنىڭ مەيىرىمىنە شومىلىپ بوي جەتكەن, اكەسىنىڭ قىزعالداعى بۇگىن ءوز جۇرتىنىڭ تابالدىرىعىن اتتادى, قادامى قۇتتى بولعاي!», — دەدى ول.
ۇزاتۋ تويى قازاقى سالت-داستۇرمەن وتكەن. جاس جۇبايلار ءتورت اي بۇرىن قۇدا ءتۇسىپ, سىرعا سالعان. ايتباەۆا بۇل قۋانىشتىڭ ەرەكشە تولقىنىس تۋدىرعانىن جاسىرمادى.
«قىز – قوناق دەگەننىڭ راستىعىنا بۇگىن كوزىمىز جەتكەندەي. كۇنى كەشە دۇنيەگە كەلگەن بالاپانىمىز قاناتىن قاعىپ, ۇلكەن ومىرگە قۇلاشىن جايىپ اتتاندى. 4 اي بۇرىن قۇدا ءتۇسىپ, سىرعا سالعان قىزىمىزدى ءسان-سالتاناتىمەن, اتا سالتتان اسىپ كەتپەي, اجەلەرىنىڭ اقىلىمەن, مىنە, ەندى عانا ۇزاتتىق. جولى بولعاي دەيمىز! كوپشىلىگىڭىز تويدىڭ ۇزىندىلەرىن الەۋمەتتىك جەلى ارقىلى كورىپ, وڭ پىكىر ايتىپ جاتىرسىزدار, سۇراقتار دا قويىلىپ جاتىر, كوپ راحمەت! تويداعى كوڭىلدەرىڭىزگە ۇناعان ساتتەر تۋرالى كەيىنىرەك تولىق ايتىپ بەرۋگە تىرىسامىن. جاقسىلىقپەن جولىعايىق!», — دەدى ايتباەۆا.
