«4 aı buryn quda túsip, syrǵa salǵan»: Sveta Aıtbaeva qyzynyń uzatylýy týraly aıtyp berdi

2025 jylǵy 1 tamyz kúni tanymal ánshi Dımash Qudaıbergenniń qaryndasy Raýshan Qudaıbergen 24 jasynda uzatyldy. Arada birneshe kún ótken soń, 7 tamyzda Raýshannyń anasy, ánshi Svetlana Aıtbaeva jelide arnaıy alǵys aıtyp, jazba jarııalady, dep habarlaıdy Qandastar.kz

Ol qazaqstandyqtarǵa rızashylyǵyn bildirip, bylaı dedi:

«Ardaqty aǵaıyn! Birneshe kúnnen beri sizderdiń aqjarma tilekterińizdi oqyp, qýanyp otyrmyz. Bizdiń otbasymyzǵa degen iltıpattaryńyz, yqylas-peıilderińiz úshin aıtar alǵysymyz sheksiz! Barshańyzdyń amandyqtaryńyzdy tileımiz! Eki baýyrynyń ortasynda erkelep ósken Raýshantaıymyzdyń da uıasynan ushar sáti jetipti. Ata-ájesiniń meıirimine shomylyp boı jetken, Ákesiniń qyzǵaldaǵy búgin óz jurtynyń tabaldyryǵyn attady, qadamy qutty bolǵaı!», — dedi ol.

Uzatý toıy qazaqy salt-dástúrmen ótken. Jas jubaılar tórt aı buryn quda túsip, syrǵa salǵan. Aıtbaeva bul qýanyshtyń erekshe tolqynys týdyrǵanyn jasyrmady.

«Qyz – qonaq degenniń rastyǵyna búgin kózimiz jetkendeı. Kúni keshe dúnıege kelgen balapanymyz qanatyn qaǵyp, úlken ómirge qulashyn jaıyp attandy. 4 aı buryn quda túsip, syrǵa salǵan qyzymyzdy sán-saltanatymen, ata salttan asyp ketpeı, ájeleriniń aqylymen, mine, endi ǵana uzattyq. Joly bolǵaı deımiz! Kópshiligińiz toıdyń úzindilerin áleýmettik jeli arqyly kórip, oń pikir aıtyp jatyrsyzdar, suraqtar da qoıylyp jatyr, kóp rahmet! Toıdaǵy kóńilderińizge unaǵan sátter týraly keıinirek tolyq aıtyp berýge tyrysamyn. Jaqsylyqpen jolyǵaıyq!», — dedi Aıtbaeva.