“4 جىلدا 160 ادامدى جۇمىستان شىعاردىم”: مايرا مۇحامەدقىزى شىمكەنتتەگى وپەرا تەاترىنىڭ بىلىعىن اشكەرەلەدى

فوتو: جەكە پاراقشادان الىندى

شىمكەنت قالالىق وپەرا جانە بالەت تەاترىنىڭ ديرەكتورى مايرا مۇحامەدقىزى قىزمەت جولىندا كەزدەسكەن قيىندىقتارىن ەسىنە الدى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

ءانشىنىڭ ءومىر جولىنا ارنالعان “العاشقى” باعدارلاماسىندا ونەر يەسىنىڭ ارىپتەستەرى ونىڭ ىسكەرلىگىن ايتىپ, ماقتادى.

”بىزگە 2021 جىلى مايرا مۇحامەدقىزى باسشىلىققا كەلدى. ول كىسى كەلگەن كەزدە تەاتردىڭ ءىشى ەسكىرىپ, ءابىرجىپ تۇرعان ەدى. زالدا ءبىر عانا جارىق جاناتىن. كورەرمەندەر وتىراتىن ورىندىقتاردىڭ توزىعى جەتكەن ەدى. مايرا مۇحامەدقىزى ءوزى دەمەۋشىلەر تاۋىپ, وتكەن جىلى تامىز ايىندا 30 ميلليونعا ورىندىقتاردى اۋىستىردى. تەاتردىڭ بارلىق جەرىنەن سۋ وتەتىن, ءىشى جىلىمايتىن. بارلىعىن جوندەۋدەن وتكىزدى. بۇرىنعى قالپىمەن سالىستىرعاندا قازىر تەاتر دەپ اۋىز تولتىرىپ ايتاتىن كۇنگە جەتتىك. شىمكەنت قالالىق وپەرا تەاترىن الەمدىك دەڭگەيگە كوتەرگىسى كەلىپ, الەمدىك دەڭگەيدەگى وپەرالاردى قويعىسى كەلدى. سول كەزدە بىزدەگى كەيبىر ماماندار ونى تۇسىنبەي, ايقاي-شۋ شىعاردى. باسىندا ۇجىم ىشىندە قاقتىعىستار كوپ بولدى. كەيبىرەۋلەر مايرا اپاي مامانداردى قۇرتىپ, ءوزىنىڭ كومانداسىن جيناپ جاتىر دەپ ويلادى. قازىر بىزگە الەمدىك دەڭگەيدەگى رەجيسسەرلار مەن ديريجەرلار كەلىپ جاتىر”, — دەيدى مايرا مۇحامەدقىزىنىڭ ارىپتەسى ەرلان قولداسباەۆ.

ونەر يەسى باسشىلىق قىزمەتكە كىرىسەر الدىندا ۇجىمداعى قىزمەتكەرلەر تاراپىنان قىسىم كورگەنىن دە جاسىرمادى.

”تەاترعا بارا سالعان كەزدە 40 جىگىت الدىمنان شىقتى. “بىزدەن سوققى جەمەي تۇرىپ, قىسىم كورمەي تۇرىپ, اقىرىنداپ كەتىپ قالىڭىز, ءبىز ءسىزدى سىيلايمىز. بىراق جاڭا ادامنىڭ كەلگەنىن قالامايمىز” دەدى. سوسىن مەن: “اينالايىندار, مەن سەندەردەن قورىقپايمىن. بۇل ومىردە ءبارىن كوردىم. مەن سىزدەردىڭ جاعدايلارىڭىزدى جاساۋ ءۇشىن كەلدىم دەدىم. قازىر سولاردىڭ ءبارى – مەنىڭ قىزمەتكەرلەرىم. وسى تەاتردىڭ جاناشىرلارى. ءبىر جاعىنان ولاردى دا تۇسىنۋگە بولادى. قانشاما جىلدار بويعى تەاترعا دەگەن ماحابباتى, ايلىقتارى از, تەاتر جابىلۋدىڭ الدىندا تۇر. سوڭعى ۇمىتتەرى قالعان ءسات. تەاتردىڭ ىشىندە دە تۋىس-تۋعانىن جۇمىسقا العان جاعدايلار بولعان. تەاترعا مۇلدە قاتىسى جوق, باسقا سالاداعى ادامدار كىرىپ كەتكەن. ءتارتىپ تە, زاڭ دا جوق بولىپ, تەاتر دەپ ايتۋعا اۋىز بارمايتىنداي بولىپ كەتكەن. 4 جىلدا 160 ادامدى جۇمىستان شىعاردىم. كادر بولىمىندەگى مامان “مايرا حانىم, بولدى ەندى, جارتى شىمكەنتتى جۇمىستان شىعاردىڭىز عوي”, دەدى. باسىندا ەندى مامان تابىلماي قالا ما دەپ تە قورىقتىم. بىراق ءبىر ەسىك جابىلسا, ەكىنشىسى اشىلادى دەگەندەي, از ايلىققا سىزبەن بىرگە جۇمىس ىستەپ, الەمدىك تاجىريبەنى كورگىمىز كەلەدى دەگەن كەرەمەت ماماندار كەلدى”, – دەيدى ول.