جاڭالىقتار
«400-گە جۋىق ادام جۇقتىرعان»: رەسەيدە كوروناۆيرۋستىڭ جاڭا شتاممى بەلەڭ الدى
فوتو: Ru.freepik.com
رەسەيدە جاڭا SARS-CoV-2 كوروناۆيرۋسىنىڭ XFG شتاممىن (ستراتۋس) جۇقتىرعاندار سانى ارتىپ كەلەدى, دەپ جازدى qandastar.kz
روسپوترەبنادزور بۇل ينفەكتسيا بۇرىنعى تۇرلەرىنە قاراعاندا جىلدام تارايتىنىن ەسكەرتتى. بۇل تۋرالى Stan.kz اقپارات اگەنتتىگى ربك باسىلىمىنا سىلتەمە جاساپ حابارلايدى.
رەسەيدە تاراپ جاتقان XFG شتاممى تەز تاراعانىمەن كوبىنە جەڭىل تۇردە وتەدى. روسپوترەبنادزوردىڭ مالىمەتىنشە, قازىر 384 جاعداي انىقتالدى. ۆەدومستۆو باسشىسى اننا پوپوۆا “ستراتۋس” شتامىمەن جۇقتىرۋ جاعدايلارى كۇن سايىن ءوسىپ جاتقانىن حابارلادى.
“ولاردىڭ سانى 300-گە جەتكەن, ودان 384 بولدى, الداعى ۋاقىتتا بۇدان دا كوپ بولادى”, — دەدى اننا پوپوۆا.
ۆيرۋس جۇقتىرعان ناۋقاستاردا مىناداي بەلگىلەر بايقالادى: جوتەل, تاماقتىڭ اۋرۋى, داۋىس قارلىعۋى نەمەسە قىرىلداۋى, تۇماۋ, باس اۋرۋى, جالپى السىزدىك پەن شارشاعىشتىق, سونداي-اق بۇلشىقەتتەردىڭ سىرقىراۋى. ەرەكشە بەلگىلەردىڭ ءبىرى – داۋىس قارلىعۋى. ادەتتە ينفەكتسيا اسقىنۋلارعا اكەلمەيدى.
اننا پوپوۆا كوروناۆيرۋس گەنوۆاريانتتارىنىڭ ارقايسىسى ۆيرۋسقا تىرشىلىك ەتۋگە جانە ەۆوليۋتسيالانۋعا مۇمكىندىك بەرەتىن ەرەكشە قاسيەتتەرگە يە بولاتىنىن اتاپ ءوتتى. سونىمەن قاتار ينفەكتسيانىڭ سالدارى ءارتۇرلى بولۋى مۇمكىن, سوندىقتان الدىن الۋ شارالارىن ساقتاپ, كۇتىنۋ كەرەگىن ەسكەرتتى.
“رەسەيدە “ستراتۋس” شتاممىن العاش رەت جۇقتىرۋ جاعدايى 2025 جىلى 24 ساۋىردە تىركەلگەن, ال الەمدە العاش رەت بۇل ۆيرۋس بيىل 27 قاڭتارىندا كانادادا انىقتالعان. شىلدە ايىنىڭ سوڭىنا قاراي رەسەيدە 114 راستالعان جاعداي تىركەلدى. اۋرۋدىڭ 54%-ى ماسكەۋگە تيەسىلى بولدى, قالعانى ماسكەۋ, ماگادان, سۆەردلوۆ جانە لەنينگراد وبلىستارىندا تىركەلدى”, – دەپ مالىمدەدى روسپوترەبنادزور.
رەسەيدىڭ دەنساۋلىق ساقتاۋ مينيسترلىگى جاڭا شتاممنىڭ باقىلاۋدا ەكەنىن ايتىپ, الاڭداۋعا نەگىز جوق دەپ سەندىردى.
