«42 500 تەڭگە اليمەنت تولەيدى»: تالدىقورعاندىق كەلىنشەك الماتى وبلىسىنىڭ ەكس-اكىمى باتالوۆتان نەكەسىز بالاسى بارىن ايتتى

• فوتو: ۆيدەودان سكرين

قارلىعاش (ەسىمى وزگەرتىلگەن) ەسىمدى ايەل الماتى وبلىسىنىڭ بۇرىنعى اكىمى اماندىق باتالوۆپەن ارادا نەكەسىز تۋىلعان بالا بارىن ايتتى. ايەل Nege.kzپورتالىنا بەرگەن سۇحباتىندا ەكس-شەنەۋنىكپەن قالاي تانىسقانىن, ونىڭ ادامدارىنان قوقان-لوقى كورگەنىن جانە سوتتا قىزىنىڭ اكەسى اماندىق باتالوۆ ەكەنىن دالەلدەي الماي الەك بولعانىن بايانداپ بەردى. بۇل تۋرالى qandastar.kz اقپارات اگەنتتىگى حابارلايدى.

كەلىنشەك اماندىق باتالوۆپەن ول الماتى وبلىسى اكىمىنىڭ ورىنباسارى قىزمەتىندە بولعاندا ءبىر جانازا كەزىندە تانىسقانىن ايتادى. ەكس-شەنەۋنىك ايەلدى كورىپ, باسقا ادام ارقىلى تەلەفون ءنومىرىن الدىرتقان.

“ول كەزدە مەن اجىراسقان ەدىم. كۇيەۋىم ەكى بالامەن تاستاپ كەتتى. جۇمىسسىزبىن, بالالارىم كىشكەنتاي. ءوزى مەنىمەن تانىسپاق بولىپ قايتا-قايت حابارلاستى. بىردە جۇرگىزۋشىسى كەلىپ مەنى باتالوۆتىڭ “كازاحستانسكي” كوشەسىندەگى ۇيىنە اپاردى. سوندا ەكەۋىمىز جاقىنىراق تانىستىق. سول كەزدە ماعان جاقسى ادام بولىپ كورىندى. ءومىرىم تۋرالى سۇرادى. مەن اكە-شەشەمنىڭ جوعىن, كۇيەۋىمنىڭ ەكى بالامەن تاستاپ كەتكەنىن ايتتىم. تاپقانىم تاماقتان ارتىلمايتىن. پاتەر جالداۋعا اقشا بولمايتىن. باسىمدا باسپانا جوعىن جىلاپ وتىرىپ ايتتىم. سودان ول ماعان كومەكتەسەمىن دەپ ۋادە بەردى. كەيىن ول كىسىمەن جاقىن قارىم-قاتىناستا بولدىق. ءسويتىپ باتالوۆتان بالا كوتەردىم”, – دەيدى قارلىعاش.

ايەل جۇكتى ەكەنىن بىلگەندە شەنەۋنىككە ايتپاستان بالانى الدىرىپ تاستاماق بولعان. الايدا جاساندى تۇسىك جاساتۋعا جۇرەگى شىعاماعان. دەسە دە قارلىعاش ەكس-شەنەۋنىكپەن بايلانىستا بولعانىن ايتادى. اراسىندا وتباسىنا بارىپ جۇرگەندە باتالوۆ حابارسىز كەتكەن. ۋاقىت وتە كەلە قىزىمدى بوساندىم. وعان ايەل پاتەرىن تولەي الماي تەلەفونىن ساتىپ جىبەرگەن ەكەن. بوسانعان سوڭ نارەستەنىڭ جاردەماقىعا جاڭا تەلەفون مەن SIM-كارتا ساتىپ العان.

“سوندا باتالوۆ “سەنىڭ ءنومىرىڭدى ارەڭ تاپتىم” دەپ ءوزى حابارلاستى. بوسانعانىمدى ايتىپ ەدىم “الماتىدامىن, جاقىن ارادا كەلەمىن, كەزدەسىپ, سويلەسەيىك” دەدى. بىراق سودان كەيىن حابارلاسپادى. قىزىم 5-6 ايعا تولعاندا وعان بالانىڭ سۋرەتتەرىن جىبەرىپ وتىردىم. ارتىق ەشتەڭە ايتپادىم. كورەدى, بىراق جاۋاپ بەرمەيتىن. ءسويتىپ قىزىم بالاباقشاعا باراتىن جاسقا جەتتى. قينالىپ كەتكەن سوڭ وزىنەن كومەك سۇرادىم. “قانشا كەرەك?” دەپ جازىپ جىبەردى. 100 مىڭ تەڭگە سۇرادىم. ءوزىنىڭ جۇرگىزۋشىسىن جىبەرىپتى. ول جۇرگىزۋشىنى مەن تانىسام دا, ول مەنى تانىماعان كەيىپ تانىتتى. ءسويتىپ كومەك قاجەت كەزدە مەن ول كىسىنىڭ WhatsApp نومىرىنە جازاتىن بولدىم. كەيىن ول كىسىدەن قىزىما تەگىن بەرۋىن نەمەسە قايتا-قايتا كومەك سۇراي بەرمەيتىندەي جاعداي جاساپ بەرۋىن سۇرادىم. وسى كەزدەن باستاپ ول مەنى بالالارىممەن قورقىتا باستادى”, – دەيدى.

ەكس-شەنەۋنىك تاراپىنان بولعان قوقان-لوقىدان كەيىن  قارلىعاش “ايشا ءبيبى» انالار بىرلەستىگىنىڭ ءتورايىمى جازيرا قامولدانوۆادان كومەك سۇراعان. ول قارلىعاشتى ارىز جازۋعا كوندىرگەن.

“ىشكى ىستەر دەپارتامەنتىنە ارىز جازدىق. بىراق ول جەردەگىلەر ءۇش بالام مەن مەنى مازاق ەتتى. “جاقىن قارىم-قاتىناستا قالاي بولدىڭدار?” دەگەن سەكىلدى تىم جەكە سۇراقتار قويدى. مەن ايتۋدان باس تارتىپ ەدىم, جىبەرمەي قامايمىز دەپ قورقىتتى. ماجبۇرلەگەن سوڭ ءبارىن ايتىپ بەردىم. سول كەزدە ۇرىمحانوۆ گەنەرال ەدى, مەنى شاقىردىم ارىزىمدى قايتارىپ الۋىمدى سۇرادى. ەسەسىنە ىشكى ىستەر دەپارتامەنتىنەن جۇمىس ۇسىندى. مەن تاجىريبەم جوق بولعاندىقتان باس تارتتىم. بۇل جاقتاعى ءىس تۇرالاپ تۇرعان سوڭ استاناداعىلارعا ارىز جازىپ, شاعىمدانۋعا ءماجبۇر بولدىم. ارىزىم ول جاققا جەتكەن سوڭ عانا ءىس قوزعالا باستادى. ءسويتىپ ول ماعان شىعىپ ءۇي الىپ بەرەمىز, كاسىبىڭدى اش دەپ ادامدار جىبەردى. استانادا دا, تالدىقورعاندا دا ماعان كومەكتەسەتىن ەشكىم جوعىن تۇسىنگەن سوڭ ارىزىمدى قايتىپ الدىم. ءسويتىپ كاسىپ اشىپ بەردى. بىراق ءۇيدى ءوزىم سۇراپ ءجۇرىپ ءۇش جىلدان كەيىن عانا الدىم”, – دەيدى قارلىعاش.

باستاپقىدا كەلىنشەككە قاعىز جازىدىرىپ الىپ, قىزعا اي سايىن اقشا سالىپ تۇرامىن دەپ ۋادە بەرگەن. بىراق كەرەك قاعازىن العان سوڭ ۋادەسىن ۇمىتتى دەيدى كەلىنشەك.

“قىزدىڭ كيىمىنە دەپ 100 مىڭ سۇرايمىن. بىراق ونى ءبىر اپتادان سوڭ, 75-85 مىڭ تەڭگە قىلىپ بەرەدى. ءسويتىپ قىزىما اكەسىنىڭ تەگىن بەرىپ, اليمەنت الۋ ءۇشىن ونى سوتقا بەردىم. سوت 4-5 رەت ارىزىمدى قايتارىپ تاستادى. ادۆوكات جالدادىم. اقىرى سوت ارىزىمدى قابىلدادى. ونىڭ قىزىمنىڭ اكەسى ەكەنىن دالەلدەۋ ءۇشىن 1,5 جىل ۋاقىت كەتتى. سۋديا قىسىم كورسەتتى. يۋۆەنالدى سوتتان جەڭىپ شىقتىم. باتالوۆتى دنك تاپسىرۋعا شاقىردى, بىراق كەلمەدى”, – دەيدى ايەل.

بۇل كەزدە ەكس-شەنەۋنىك زەينەتتە ەدى. قارلىعاش كامەلەت جاسقا تولماعان قىزىنا 42 500 تەڭگە اليمەنت الىپ وتىرعان. قارلىعاش باتالوۆتىڭ زەينەتاقىدان بولەك تابىسى بارىنا سەنىمدى. سول سەبەپتى ول اليمەنتتىڭ ءادىل تاعايىندالۋىن تالاپ ەتەدى.

قارلىعاشتىڭ ايتۋىنشا, قىزى اكەسىنە تەلەفون ارقىلى حابارلاما جازعان. قىزدىڭ سۋرەتىن كورگەن سوڭ ەكس-شەنەۋنىك ءنومىردى بۇعاتتاپ تاستاعان.

“تالعارداعى ۇيىنە دە باردىق. سول كەزدە قىزىم قاتتى جىلادى. “ماما, مەن اكەمنىڭ وسىنداي ۇيدە تۇراتىنىن بىلمەدىم. قانداي كۇشتى ءۇي, قالايىنشى” دەدى قىزىم. سىرتتا تۇرعاندا قاقپادان قايتا-قايتا سىعالاپ, كانيكۋل كەزىندە وسى جاققا جىبەرۋىن سۇرادى. بىردە كۇزەتتەگىلەردەن بىرەۋى شىعىپ ۇيدە جۇمىسشىلاردان باسقا ەشكىم جوعىن ايتتى. سول ادامعا مەنىڭ سوزدەرىمدى تىكەلەي وزىنە جەتكىزۋىمدى سۇرادىم. مەنى “اقشاعا تويمايدى” دەپ ايتاتىن كورىنەدى. بىراق ول كىسى ماعان اي سايىن ميلليونداپ اقشا بەرگەن ەمەس. قايتىپ بارا جاتىپ قىزىم “اكەمدى كورمەيمىن بە, تەلەديداردان عانا كوردىم عوي” دەپ جىلادى. اكەسىنىڭ سۋرەتى قىزىمنىڭ بولمەسىندە تۇر. “اكەمە ۇقسايمىن” دەپ ءوزى دە ايتادى. اكەسىن قىزىما جامانداعان ەمەسپىن. قىزىم اكەسىن كورگىسى كەلەدى”, – دەيدى قارلىعاش.