“450 مەترلىك جەراستى توننەلىن قازعان”. قازاقستاننان وزبەكستانعا جانارماي ونىمدەرىن جاسىرىن وتكىزبەك بولعاندار ۇستالدى

جاقىندا جانارماي ونىمدەرىن جاسىرىن توننەل ارقىلى شەكارادان وتكىزۋمەن اينالىسقان حالىقارالىق قىلمىستىق توپتىڭ ارەكەتىن اشكەرەلەدى, دەپ جازدى Qandastar.kz.

قىلمىستى اشۋعا تۇركىستان وبلىسى پروكۋراتۋراسى, قارجىلىق مونيتورينگ اگەنتتىگى جانە ۇلتتىق قاۋىپسىزدىك كوميتەتىنىڭ وبلىستىق دەپارتامەنتتەرى جانە وزبەكستان قۇقىق قورعاۋ ورگاندارى ۇلەس قوسقان.

قارجىلىق مونيتورينگ اگەنتتىگىنىڭ حابارلاۋىنشا, تەرگەۋ بارىسىندا انىقتالعانداي قازاقستان مەن وزبەكستان اراسىنداعى شەكاراعا جاقىن اۋماقتا توپ مۇشەلەرى 450 مەترلىك جەراستى توننەلىن قازعان.

“قىلمىستىق سحەما 2 اي بويى جۇمىس ىستەگەن. وسى ۋاقىت ىشىندە شەتەلدەن قارجىلاندىرىلىپ وتىرعان جانار-جاعارماي ماتەريالدارىن تاسىمالداۋعا ارنالعان لوگيستيكالىق باعىتتار مەن جاسىرىن شىعارۋ ارناسى قۇرىلعان.

وپەراتسيا بارىسىندا وزبەكستان تاراپى دا ءوز اۋماعىندا ءدال وسىنداي شارالار جۇرگىزگەن.

ناتيجەسىندە قىلمىستىق ارەكەتكە قاتىسى بار بارلىق تۇلعالار انىقتالدى. قازاقستان رەسپۋبليكاسىنىڭ 5 ازاماتى كۇدىكتى رەتىندە تانىلدى.

قازىرگى ۋاقىتتا تەرگەۋ اياقتالىپ, قىلمىستىق ءىس سوتقا جولداندى”,- دەلىنگەن رەسمي حابارلامادا.