جاڭالىقتار
46 كەنشىنىڭ ءولىمى: كوستەنكو شاحتاسىنداعى اپاتقا قاتىستى سوت ۇكىمى شىقتى
فوتو: Google Maps/الەكساندر حاننانوۆ
قاراعاندىدا 46 كەنشىنىڭ ولىمىنە اكەلگەن كوستەنكو شاحتاسىنداعى اپاتقا قاتىستى ءىس بويىنشا سوت ۇكىمى شىقتى, دەپ جازدى qandastar.kz
بۇل تۋرالى Stan.kz اقپارات اگەنتتىگى حابارلايدى.
ايىپتالۋشىلار قاتارىندا شاحتا باسشىلارى مەن ينجەنەرلىك-تەحنيكالىق قىزمەتكەرلەردى قوسا العاندا, ون ادام بار. توعىز ايىپتالۋشى قاماۋدا وتىرسا, بىرەۋى – ەلدەن كەتپەۋ تۋرالى قولحاتپەن بوساتىلعان.
كۇدىكتىلەرگە قىلمىستىق كودەكستىڭ “ەكى جانە ودان دا كوپ ادامنىڭ ولىمىنە اكەپ سوققان تاۋ-كەن جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ” بابى بويىنشا ايىپ تاعىلعان.
سوت ايىپتالۋشىلاردى كىنالى دەپ تانىپ, كەلەسى جازالاردى تاعايىندادى:
— شاحتا ديرەكتورى سەرگەي مۋستيۆكو – 8 جىلعا باس بوستاندىعىنان ايىرۋ;
— شاحتا ديرەكتورىنىڭ ءوندىرىس جونىندەگى ورىنباسارى ۆاديم ەريومين – 7 جىلعا باس بوستاندىعىنان ايىرۋ;
— باس ينجەنەر نيكولاي گروزنوۆ – 7 جىلعا باس بوستاندىعىنان ايىرۋ;
— №6 ۋچاسكە باستىعى ۆيكتور كوپتەنكوۆ – 7 جىلعا باس بوستاندىعىنان ايىرۋ;
— تەحنيكالىق قىزمەتتىڭ قازۋ جونىندەگى باس ينجەنەرىنىڭ ورىنباسارى ۆلاديمير گوننوچەنكو – 6 جىل 6 ايعا باس بوستاندىعىنان ايىرۋ;
— ەڭبەك قاۋىپسىزدىگى جونىندەگى باس ينجەنەردىڭ ورىنباسارى دميتري فەدورەنكو – 6 جىلعا باس بوستاندىعىنان ايىرۋ;
— باس مەحانيك دميتري كوتسار – 6 جىلعا باس بوستاندىعىنان ايىرۋ;
— ۋچاسكە باستىعىنىڭ شاڭ-جارىلىسقا قارسى قورعاۋ جونىندەگى كومەكشىسى ۆيتالي پەسترياك – 6 جىلعا باس بوستاندىعىنان ايىرۋ;
— كونۆەيەرلىك كولىك ۋچاسكەسىنىڭ باستىعى تولەگەن عابدۋشەۆ – 5 جىلعا باس بوستاندىعىنان ايىرۋ;
— جەلدەتۋ جانە ەڭبەك قاۋىپسىزدىگى ۋچاسكەسىنىڭ باستىعى ۆلاديمير شيشكانوۆ – 5 جىلعا باس بوستاندىعىنان ايىرۋ.
سوت پروتسەسى قاراعاندىداعى تەرگەۋ يزولياتورىنىڭ سپورت زالىندا ءوتتى. ءىس بويىنشا 74 ادام جابىرلەنۋشى بولىپ تانىلعان.
سوت بارىسىندا پروكۋرورلار ايىپتالۋشىلارعا 46 كەنشىنىڭ ولىمىنە جانە 20-دان استام ادامنىڭ مۇگەدەك بولۋىنا اكەپ سوققان تاۋ-كەن جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزعانى ءۇشىن ەڭ جوعارعى جازا مەرزىمىن تاعايىنداۋدى سۇراعان ەدى.
ەسكە سالساق, 2023 جىلدىڭ 28 قازانىندا قاراعاندىداعىكوستەنكو شاحتاسىندا جارىلىس بولىپ, 46 كەنشى قازا تاپقانەدى. اپاتتى تەكسەرگەن ۇكىمەتتىك كوميسسيا جارىلىستىڭ كونۆەيەرلەردىڭ بىرىندەگى ۇيكەلىس اسەرىنەن پايدا بولعان مەحانيكالىق ۇشقىننان بولعانىن انىقتاپ, 100 پايىز جۇمىس بەرۋشىنىڭ كىناسىدەپ تاپتى.
