5 ميلليون تەڭگە: تاربيەشى الماتىداعى بوبەكتەر ءۇيىنىڭ قوماقتى قارجىعا بالا اسىراۋعا بەرەتىنىن ايتتى

فوتو: ۆيدەودان سكرين

بوبەكتەرى ءۇيىنىڭ تاربيەشىسى ويدا-جوقتا مەكەمەنىڭ اقشا ءۇشىن بالاعا قورعانشىلىق بەرەتىنىن بىلگەن. مەكەمە باسشىسى قىزمەتكەرىنىڭ بۇل ءسوزىن جوققا شىعاردى. بۇل تۋرالى qandastar.kz  كتك ارناسىنا سىلتەمە جاساپ حابارلايدى.

بوبەكتەر ۇيىندە 27 جىل قىزمەت ەتىپ كەلگەن گۇلميرا تۇسىنىكسىز جاعدايدىڭ كۋاسى بولعان. ايتۋىنشا, مەكەمەگە قىمبات كولىك مىنگەن كاسىپكەرلەر وزىن “دەمەۋشىمىن” دەپ تانىستىرىپ, ءجيى كەلەدى. ءسويتىپ ولار قىزمەتكەرلەرىن ىلەستىرىپ, بالالاردى ويىن-ساۋىق ورتالىقتارىنا وزىمەن الىپ كەتەدى. كەيىنىرەك كاسىپكەرلەر مۋسليما ەسىمدى ەكى جاستاعى قىز تۋرالى سۇراستىرا باستاعان.

“بەلگىسىز ادامدار ءوزىن “دەمەۋشىمىن” دەپ تانىستىرىپ, بالالاردى الىپ كەتۋىدىڭ جولىن ىزدەيدى. ولار مۋسليما ەسىمدى بالانى ۇناتىپ, ءتىپتى الىپ كەتەتىندەرىن ايتتى. العاش كەلگەندە كامپيت تاراتتى. سوسىن تاعى كەلىپ, بالانى الىپ شىعۋىمىزدى سۇرايدى. زاڭ بويىنشا بوگدە ادامداردىڭ بالامەن سويلەسۋىنە رۇقسات جوق. ولار ماعان قىزدىڭ قۇجاتتارىن راسىمدەۋگە كومەكتەسەتىن تانىستارى بارىن ايتتى. ءسويتىپ ولار قىزعا اپتا سايىن كەلىپ تۇراتىن بولدى. بىردە ولار پورتالدان تابىلىپ, قىزعا قورعانشى بولۋعا رۇقسات الدى. دال مۋسليمانىڭ تۋعان كۇنىندە قىزدى ويىن-ساۋىق ورتالىعىنا الىپ كەتتى”, – دەيدى تاربيەشى.

گۇلميرانىڭ ايتۋىنشا, مەكەمەدە 4 جاسقا دەيىنگى بالالار تاربيەلەنەدى. الايدا كوبىنە بالا اسىراپ العىسى كەلەتىن ادامدار جاڭا تۋعان نارەستەنى الۋعا اۋەس. وسىعان بايلانىستى, ايەل مەكەمە قوماقتى قارجىعا قورعانشىلىق راسىمدەيدى دەگەن بولجامعا كەلدى. تاربيەشى وسىدان بەس اي بۇرىن اتا-انا تۋعانىنا 7 كۇن بولعان بالانى اسىراپ العانىن ايتادى. نارەستەنى پەرزەنتحانادان اكەلە سالىپ, قۇجاتىن راسىمدەۋگە الىپ كەتتى. گۇلميرا جاڭا تۋعان بالانى قالايشى تەز اسىراپ الۋعا بولادى دەپ تاڭعالعاندا الگى ايەل “5 ميلليون تەڭگە بەرسەڭ كومەكتەسەمىن” دەگەن ەكەن.

بۇل تۋرالى مەكەمە باسشىلىعىنا ايتقاندا باستىق وعان اشۋلانىپ, قاتاڭ سوگىس جاريالاعان. مەكەمە ديرەكتورىنىڭ ايتۋىنشا, تاربيەشى بۇعان دەيىن مۋسليما ەسىمدى قىزدى ءوزى اسىراپ العىسى كەلگەن. الايدا وعان قورعانشىلىققا رۇقسات بەرىلمەدى. سول سەبەپتى ايەل وسىلايشا كەك الماق بولعان دەيدى.

مەكەمە وكىلدەرى دەمەۋشىلەردىڭ كەلگەنىن جوققا شىعارمايدى. ولار بالالاردىڭ جانىنا تاربيەشىلەردى ىلەستىرىپ ويىن-ساۋىق ورتالىعىنا اپاردى. ديرەكتوردىڭ ايتۋىنشا, مۇنداي سەرۋەندەر بالانىڭ قوعامعا ۇيرەنىسىپ, سىڭىسۋى ۇشىن قاجەت. الايدا ول بالالاردىڭ كاسىپكەرلەرگە اقشا ءۇشىن بەرىلگەنى تۋرالى ايىپتاۋلاردى جوققا شىعاردى.

“ – بالالاردى تانىس ارقىلى اسىراپ الىنعانى تۋرالى اقپاراتتى راستايسىز با?

– جوق, ارينە. ول قالاي بولماق? ەلەكتروندى پورتال بار. وندا اسفراپ الۋعا بولاتىن بالالاردىڭ ءتىزىمى بار. وندا انا-انالار مەكتەبىنەن وتكەن ادامدار عانا كىرە الادى.

– بالا اسىراپ العان انالاردىڭ ءبىرى 5 ميلليون بەرسە ەش كەدەرگىسىز قورعانشىلىق الۋعا كومەكتەسەتىنىن ايتقان ەكەن. بۇل تۋرالى نە ايتاسىز?

– ول ءتۇرلى نارسەنى ايتۋى مۇمكىن. 5 ميلليون تەڭگەنى كىمگە بەرۋگە بولاتىنىن دالەلدەسىن. بالانى وزدىگىمەن الىپ كەتۋگە بولمايدى”, – دەيدى الماتى قالاسىنداعى «مامانداندىرىلعان بوبەكتەر ءۇيى» كمم ديرەكتورى ايدار مامەدوۆ.

قازىر بوبەكتەر ۇيىندە 24 بالا تاربيەلەنىپ جاتىر. جاڭا تۋىلعان نارەستەلەر پەرزەنتحانادان بىردەن بوبەكتەر ۇيىنە كەلەدى. ءسويتىپ 4 جاسىنا دەيىن سوندا بولىپ, كەيىن بالالار ۇيىنە جىبەرىلەدى.

ءبىلىم ءبولىمىنىڭ مالىمەتىنشە, قازىر بالا اسىراپ الۋ وڭاي ەمەس. وتىنىش بەرۋشىلەر قامقورشىلىق ورگاندارىنا جۇگىنەدى, وندا ماماندار ولاردىڭ قارجىلىق جانە تۇرمىستىق جاعدايىن زەرتتەيدى. سونىمەن قاتار ۇمىتكەرلەر پاتروناتتىق اتا-انالار مەكتەبىندە وقۋدان ءوتۋى كەرەك. سوندان كەيىن عانا بالا اسىراپ الۋعا مۇمكىندىك الادى.

“ولار بالالارمەن تانىسۋ ءۇشىن كەزەككە تۇرادى. ەگەر اتا-انا بالاعا ۇناسا, بالانى تاڭداپ, كەيىننەن قورعانشىلىق ورگاندارىنا نەمەسە بالانىڭ ورنالاسقان جەرىندەگى سوتقا بالانى اسىراپ الۋ تۋرالى ءوتىنىش بەرەدى”, – دەيدى الماتى قالاسى مەدەۋ اۋداندىق ءبىلىم ءبولىمىنىڭ باس مامانى ارمان جەدەلوۆ.

گۇلميرا مەكەمەگە قاتىستى پوليتسياعا ارىز تۇسىرگەن. قازىر پوليتسيا تەكسەرۋ جۇمىستارىن جۇگىزىپ جاتىر.

“قىلمىستىق قۇقىق بۇزۋشىلىق بەلگىلەرى انىقتالعان جاعدايدا شارالار قابىلدانىپ, بۇل دەرەك سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلەدى. قازىرگى ۋاقىتتا اتالعان دەرەككە قاتىستى تەكسەرۋ جۇمىستارى جۇرگىزىلۋدە. دالەلدەر راستالعان جاعدايدا زاڭعا سايكەس شارالار قولدانىلادى”, – دەدى الماتى قالالىق پوليتسيا دەپارتامەنتىنىڭ رەسمي وكىلى سالتانات ازىربەك.