«5 mlrd teńge bólgenshe, «Qaısar» chempıon bolmaı-aq qoısyn»: Qyzylorda oblysynyń ákimi fýtbol klýbyna nege aqsha bergisi kelmeıdi?

Foto: kzvesti.kz

Qyzylordanyń «Qaısar» fýtbol klýby oıynshylarynyń jalaqysyn jarytyp tóleı almaı keledi. BAQ ókilderiniń habarlaýynsha, ujymda sońǵy úsh aıdan beri aılyq almaǵan fýtbolshylar kóp. Onyń ústine, klýb burynnan qalyp ketken 400 mln teńge qaryzyn jyl saıyn bólip tólep keledi, dep jazady qandastar.kz saıty 1bol.kz saıtyna siltep.

Osy oraıda biz Qyzylorda oblysynyń ákimi Nurlybek Nálibaevtan qarjy máselesiniń qashan sheshiletinin suradyq. Onyń sózinen uqqanymyz, «Qaısardyń» ákimdikten alatyn bıýdjeti jaqyn ýaqytta óspeıdi.

«Syrttan kelgen oıynshylarǵa bosqa aqsha tólegennen góri turǵyndar paıdaly mańyzdy jobalardy qolǵa alǵanymyz jón. Maǵan da klýbtyń basshysy kelip, «qarajatty kóbeıtsek, budan da jaqsy nátıje kórsetemiz, birinshi oryn alamyz» deıdi. Bıýdjetten 5 mlrd teńge bólip, birinshi bolmaı-aq qoıdyq dedim. «Qaısar» – bıýdjetten eń az qarajat qarastyrylǵan komanda, men ony moıyndaımyn. Bıýdjet jaǵynan eń tómengi oryndarda turǵanymyz anyq. Biraq sol aqshany aýyldarda sportty damytýǵa bólgenimiz durys. 80 sport alańy salyndy. Stadıon salynyp jatyr. Sport keshenderi salynyp jatyr. Bizdiń maqsat – qalaǵa kórik beretin ǵımarattar emes, qarakózderimizdi tárbıeleıtin, paıdasy tıetin nysandar salý», – dedi ákim.

Nurlybek Nálibaev klýbtyń oıynshylar aldyndaǵy qaryzyna qatysty saýalǵa da jaýap berdi.

«Qaryz bizge deıin bolǵan. Klýb basshylyǵyna tapsyrma berdim. Eger shyn máninde bizdiń qaryz ekenimiz dáleldense, onda bárin ótep beremiz. Bul máseleni kóterip júrgen – syrttan kelgen oıynshylar, alaıda olarǵa tıimsiz qarajatty jumsaı berýge qarsymyn. Kezinde «Aqtóbe» de qarjylyq qıyndyqtarǵa tap bolyp, legıonerlerine aqsha tóleı almaı jatqanda, 17 jastaǵy fýtbolshylardan turatyn ekinshi quramy kelip «Qaısardy» utyp ketken. Kádimgi aýyldyń jap-jas balalary, sol namystyń arqasy edi. Keıin «Qaısar» «Aqtóbeniń» negizgi quramyn qonaqta utyp ketti. Sondyqtan eline, aýylyna jany ashıtyn adamdardy tárbıeleý kerek», – dedi.

Biraq jastardyń damýyna jol ashqysy keletin oblys nelikten Birinshi lıgada oınaıtyn «Qaısar Shıeli» komandasyn taratyp jiberdi? Ákimnen osy jaıt týraly da suradyq.

«Shıelidegi komandany jaýyp tastaý degen bolǵan joq. Qaıta jaqsy stadıon salyp berdik, sonda daıyndalyp júr. Biz kelgende «Qaısar» Birinshi lıgada júrgen, biz sol qarajatpen-aq klýbty Premer-lıgaǵa shyǵardyq. Týrnırlik kestede 6-shy, ári ketse 7-orynda kele jatyr. Qoldaý bolmasa, joǵary lıgaǵa qalaı shyǵatyn edi? Qoldaý bar, stadıonnyń salynýy osy sózimizge dálel. Biraq klýbtyń quramyn qaraımyz. О́z oıynshylarymyzdy, jastarymyzdy kóptep tartatyn bolamyz», – dep jaýap berdi ol.

Degenmen ÝEFA, FIFA sekildi uıymdar klýbtardyń oıynshylar aldyndaǵy qaryzdaryna mundaıǵa qatty qaraıdy. Ákimnen: «Eger qatelik ketkeni rastalsa, legıonerlermen kelisimshartqa otyrǵan 2019-2020 jyldardaǵy basshylyq jazalana ma?» dep suradyq.

«Fýtboldyń aınalasynda shý kóp. Qazir Antıkor bárin jiti tekserip jatyr. Tekseris aıaqtalmaıynsha ashyp aıtqan durys emes shyǵar. Bári naqtylanǵan soń, mán-jaı anyqtalady», – dep qorytyndylady ákim.