«5 jasymda birneshe erkek bir jyl boıy zorlady»: Atyraýlyq jigit adamshoshyrlyq oqıǵasyn aıtty

Foto: skrın

Atyraýlyq Baýyrjan esimdi azamat 5 jasynda seksýaldyq zorlyq-zombylyq kórgenin aıtty. Oqıǵanyń mán-jaıyn ol Gúlmıra Ábiqaıǵa bergen suhbatynda aıtyp berdi, dep habarlaıdy qandastar.kz Caravan.kz-ke silteme jasap.

Baýyrjan Kóbeev esimdi azamattyń sózine sensek, ony bala kúninde tórt eresek jigit zorlaǵan.

«Bul oqıǵa birneshe jyl buryn bolsa da, men ony bir sátke bolsyn esten shyǵarǵan emespin. Shamamen 5 jasymda aýladaǵy eresek jigitter birneshe ret seksýaldy zorlyq-zombylyq kórsetti. Men bul oqıǵany bireýge aıtýǵa qoryqtym. Qazirdiń ózinde sol jaǵdaı týraly aıtý óte qıyn. Degenmen, barlyǵy qalaı bolǵanyn búkpesiz aıtýǵa tyrysamyn. Bala kezimde ata-anam únemi jumysta boldy, men balabaqshadan tys ýaqytta jáne demalys kúnderi jalǵyz qalatynmyn. Sol ýaqyttary tórt eresek jigit meni birneshe ret zorlady. Bireýiniń esimin ataı almaımyn. Qalǵan úsheýi Aslan, Baýyrjan, Rasýl esimdi jigitter. Aýlamyzda balalar jınalatyn jabyq jer boldy. Meni sol jerge shaqyryp, aram pıǵyldaryn júzege asyrdy. 5 jasymda ne bolyp jatqanyn durys túsinbeıtinmin de. Shamamen bul nárse bir jylǵa sozyldy. Sebebi, bir jyldan keıin ata-anam meni demalys kúnderi kórshi ájege tastap ketetin boldy. Oǵan deıin senbi jáne jeksenbi kúnderi qaraýsyz júretin edim. Ýaqyt óte bolǵan nárseni esińe túsirgende sol jaman áreket saǵan jasalǵanyn túsinesiń, tuıyqtala bastaısyń. Tipti, ózińdi qalaı ustap, kimge aıtaryńdy da bilmeısiń», — deıdi ol.

5 jasynda zorlanǵan Baýyrjan 13 jasynda ómirindegi ekinshi aýyr kezeń bastalǵanyn aıtty.

«Meni zorlaǵan tórt jigittiń bireýi aıtyp qoısa kerek, solarmen jasty bir jigit meni bopsalaı bastady. Aqsha ber, áıtpese bolǵan oqıǵany aıtyp beremin degen syńaı tanytty. Aqsha aparyp bergenimde, ol óziniń jynys múshesin shyǵaryp, aýzyńa sal dedi. Sonda sen maǵan qaryz bolmaısyń dedi. Men aqshany tastap, qashyp kettim. Odan keıin ol menen aqsha suraýdy jıiletti. Odan basqa jigitter de seniń oqıǵańdy bilemiz dep aqsha suraı bastady. О́tken jyldyń qarasha aıyna deıin men sol jigitterge aqsha berip keldim. Aıyna 10 myńnan bastap 800 myńǵa deıin alyp júrdi. Qaryzǵa kirip kettim, kásibim durys júrmeı qaldy. Sodan soń sýııd týraly oılana bastadym. Osy máseleni aıtyp jeńildegim keldi. Mundaı jaǵdaı kez kelgen balanyń basynan ótýi múmkin», — deıdi ol