5000 qazaqstandyq jas sport alańdaryn tazartty

Foto: Dala qyrandary

Búgin Astanadaǵy Trıatlon saıabaǵy men basqa da qalalardaǵy sport alańdary erekshe qozǵalysqa toldy. Elimizdiń 20-dan astam qalasynda LED-ekran arqyly tikeleı kórsetilgen #jattyǵý jobasy jańa maýsymyn ashty.

Bul el boıynsha 5000-ǵa jýyq jastyń bir ýaqytta bir rıtmmen qımyldap, tazalyq pen tártipke ún qosqan kún boldy. #jattyǵý – bul jaı ǵana tańǵy dene jattyǵýy emes. Bul – jastardyń jaýapkershilik pen qoǵamǵa qyzmet etý mádenıetin qalyptastyrýǵa arnalǵan qozǵalysy. 2022 jyly «Dala Qyrandary» uıymynyń bastamasymen iske qosylǵan bul joba búginde myńdaǵan jasqa úlgi bolyp otyr.

Astanadaǵy is-sharany ashqan uıym úılestirýshisi Nurǵalı Tursynǵazıev «Taza Qazaqstan» tujyrymdamasynyń mánin erekshe atap ótti, dep jazdy qandastar.kz

«Qazaqstannyń qanshalyqty taza bolatyny – ózimizge baılanysty. Tazalyq jınaǵan jerde emes, lastamaıtyn jerde bolady. Biz aýladan bastap, qalamyzǵa deıin jaýapkershilikti óz moınymyzǵa alamyz. Bul – bizdiń ómir saltymyz bolýy tıis», – dedi ol.

Sóıtip Nurǵalı Tursynǵazıev jattyǵýǵa start berip, elordalyq qyrandarmen birge sergitý jattyǵýyn bastady. Jattyǵýdan keıin qatysýshylar birden senbilikke kóshti. Park aýmaǵy tazartylyp, sport jabdyqtary jańartyldy. Ár jattyǵý alańynda aqparattyq taqtalar ornatylyp, endi ol jerde qala turǵyndaryna arnalǵan tegin jattyǵý kestesi jarııalanyp otyrady. Is-shara qatysýshysy, uıymnyń belsendi múshesi Saǵıda Zeınadılova sporttyq jıynǵa qatysty oıyn aıtty.

«Jattyǵý qurylǵylary synbasyn, balalar úshin qaýipsiz orta qalyptassyn desek — tazalyq pen tártipti saqtaý mádenıetke aınalýy kerek. Biz ár aýlada úlgi kórsetkimiz keledi. Búgin bizben birge 5000 jas Qazaqstannyń túkpir-túkpirinde óz alańyn tańdady. Endi árbir alańǵa «qyrandar» jaýapty bolady», – dedi ol.

#jattyǵý jobasy Qazaqstan Respýblıkasynyń Týrızm jáne sport mınıstrliginiń resmı qoldaýymen júzege asyp keledi. 2024 jyly jasalǵan memorandým nátıjesinde jobanyń aýqymy keńeıip, tek fızıkalyq belsendilik emes, qoǵamdyq sana men ortaq jaýapkershilikke basymdyq berilip keledi.

Astanadan bastalǵan jattyǵý estafetasy Shymkent, Qaraǵandy, Oral, Semeı sııaqty qalalarǵa taralyp, bir kúnde 5000-nan astam jas ortaq mıssııany qolǵa aldy – óz qalasyn, óz aýlalaryn taza, qaýipsiz ári tartymdy etý.