6 اي كومادا جاتقان سارباز ەربايان مۇحتار ەۋروپاعا ەمدەلۋگە اتتانادى

فوتو: اشىق دەرەككوز

ەربايان مۇحتار الداعى ۋاقىتتا ەۋروپاعا ەمدەلۋگە اتتانادى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساي وتىرىپ حابارلايدى.

ەرباياننىڭ اتا-اناسى استانادا وتكەن بريفينگتە ازىرگە گەرمانياداعى كلينيكانى تاڭداپ جاتقانىن ايتتى. ەمدەۋگە شامامەن 230 ميلليون تەڭگە جينالدى, بۇل اقشا وڭالتۋدىڭ العاشقى ءۇش ايىنا جەتەدى.

سونداي-اق بريفينگتە ساربازدىڭ الدىن الا دياگنوزى جاريالاندى. وعان «مي جاراقاتى, باس سۇيەگىنىڭ تۇبىنەن اۋىر اشىق باسسۇيەك-مي جاراقاتىنان كەيىنگى جاعداي, فلەبيت جانە ترومبوفلەبيتتەن كەيىنگى جاعداي» دياگنوزى قويىلدى.

فلەبيت – ۆەنوزدى تامىرلاردىڭ قابىنۋى, ال ترومبوفلەبيت – قان ۇيىعاننان ۆەنوزدى قابىرعانىڭ قابىنۋى.

اكەسىنىڭ ايتۋىنشا, ەرباياننىڭ جاعدايى ءتاۋىر بولىپ قالدى.

«جاعدايى بىراق جاقسارىپ قالدى. 3 جاسار قارىنداسىمەن «سۋ-لي-فا وينايدى. كەشكە بىردەڭە ويلاپ تابادى, ونى قولمەن, كوزبەن تۇسىندىرەدى. ءبارىمىز اڭگىمەلەسەمىز», – دەدى ول.

ەرباياندى ەمدەيتىن دارىگەرلەر اتا-اناسىنا ونىڭ اياعىنان تۇرۋ ىقتيمالدىعى 80-85% دەپ سەندىردى.

اتا-انا مەن قورعاۋشى ينگا يمانباي ءادىل تەرگەۋدى تالاپ ەتىپ, ساربازدىڭ قۇلاعان ءساتىنىڭ ۆيدەوسىن كورسەتۋدى سۇرادى.

ايتا كەتەيىك, ەربايان مۇحتار ۇلتتىق ۇلاننىڭ الماتى قالاسىنداعى 5571 اسكەري بولىمىندە اسكەري بورىشىن وتەپ جۇرگەن. 2023 جىلدىڭ جەلتوقسانىندا سارباز مي جاراقاتىن الىپ, سودان كەيىن كوماعا تۇسكەن. اسكەريلەر تۋىستارىنا ەرباياننىڭ دارەتحانادا قۇلاپ, باسىن ەدەنگە سوعىپ العانىن ايتقان. الايدا ساربازدىڭ جاقىندارى ۇلدارىنىڭ ابايسىزدا قۇلاپ قالعانىنا سەنبەيدى. ىشكى ىستەر مينيسترلىگى تەرگەۋ بارىسىن ءوز باقىلاۋىنا الدى.

ەسكە سالساق, بۇعان دەيىن قازاقستاندىقتار 6 ايدان استام كومادا جاتقان سارباز ەربايان مۇحتارعا 140 ميلليون تەڭگە جيناپ بەرگەن ەدى.