6 aı komada jatqan sarbaz Erbaıan Muhtar Eýropaǵa emdelýge attanady

Foto: ashyq derekkóz

Erbaıan Muhtar aldaǵy ýaqytta Eýropaǵa emdelýge attanady. Bul týraly qandastar.kz Stan.kz aqparat agenttigine silteme jasaı otyryp habarlaıdy.

Erbaıannyń ata-anasy Astanada ótken brıfıngte ázirge Germanııadaǵy klınıkany tańdap jatqanyn aıtty. Emdeýge shamamen 230 mıllıon teńge jınaldy, bul aqsha ońaltýdyń alǵashqy úsh aıyna jetedi.

Sondaı-aq brıfıngte sarbazdyń aldyn ala dıagnozy jarııalandy. Oǵan «mı jaraqaty, bas súıeginiń túbinen aýyr ashyq bassúıek-mı jaraqatynan keıingi jaǵdaı, flebıt jáne tromboflebıtten keıingi jaǵdaı» dıagnozy qoıyldy.

Flebıt – venozdy tamyrlardyń qabynýy, al tromboflebıt – qan uıyǵannan venozdy qabyrǵanyń qabynýy.

Ákesiniń aıtýynsha, Erbaıannyń jaǵdaıy táýir bolyp qaldy.

«Jaǵdaıy biraq jaqsaryp qaldy. 3 jasar qaryndasymen «sý-lı-fa oınaıdy. Keshke birdeńe oılap tabady, ony qolmen, kózben túsindiredi. Bárimiz áńgimelesemiz», – dedi ol.

Erbaıandy emdeıtin dárigerler ata-anasyna onyń aıaǵynan turý yqtımaldyǵy 80-85% dep sendirdi.

Ata-ana men qorǵaýshy Inga Imanbaı ádil tergeýdi talap etip, sarbazdyń qulaǵan sátiniń vıdeosyn kórsetýdi surady.

Aıta keteıik, Erbaıan Muhtar Ulttyq ulannyń Almaty qalasyndaǵy 5571 áskerı bóliminde áskerı boryshyn ótep júrgen. 2023 jyldyń jeltoqsanynda sarbaz mı jaraqatyn alyp, sodan keıin komaǵa túsken. Áskerıler týystaryna Erbaıannyń dárethanada qulap, basyn edenge soǵyp alǵanyn aıtqan. Alaıda sarbazdyń jaqyndary uldarynyń abaısyzda qulap qalǵanyna senbeıdi. Ishki ister mınıstrligi tergeý barysyn óz baqylaýyna aldy.

Eske salsaq, buǵan deıin qazaqstandyqtar 6 aıdan astam komada jatqan sarbaz Erbaıan Muhtarǵa 140 mıllıon teńge jınap bergen edi.