«6-دان از بالاسى بار وتباسىلار جاردەماقىدان ايىرىلۋى مۇمكىن»: مينيسترلىك اقپاراتقا جاۋاپ بەردى

ەڭبەك جانە حالىقتى الەۋمەتتىك قورعاۋ مينيسترلىگى «6-دان از بالاسى بار كوپبالالى وتباسىلار مەملەكەتتىك جاردەماقىدان ايىرىلۋى مۇمكىن» دەگەن اقپاراتتى جوققا شىعاردى, دەپ جازدى Qandastar.kz.

«بىرقاتار باق, اقپاراتتىق توپتار مەن الەۋمەتتىك جەلى پاراقشالارىندا قولدانىستاعى زاڭناماعا سايكەس 6 جانە ودان دا كوپبالالى وتباسىلار عانا كوپبالالى وتباسى بولىپ سانالادى دەگەن جالعان اقپاراتتار تارالىپ جاتىر.

قر ەڭبەك جانە حالىقتى الەۋمەتتىك قورعاۋ مينيسترلىگى قولدانىستاعى زاڭناماعا سايكەس 4 جانە ودان دا كوپ كامەلەتكە تولماعان بالالارى نەمەسە بىرگە تۇراتىن 23 جاسقا دەيىنگى كۇندىزگى بولىمدە وقيتىن ستۋدەنتتەرى بار وتباسىنا كوپبالالى وتباسى مارتەبەسى بەرىلەتىنىن حابارلايدى.

مۇنداي وتباسىلارعا تابىسىنا قاراماستان اي سايىنعى جاردەماقى تولەنەدى. كوپبالالى وتباسىلارعا تولەنەتىن تولەمدەردىڭ مولشەرى بالالاردىڭ سانىنا بايلانىستى سارالانادى جانە 2025 جىلى:

— 4 بالاعا – 16,03 اەك نەمەسە 63 030 تەڭگە;

— 5 بالاعا – 20,04 اەك نەمەسە 78 798 تەڭگە;

— 6 بالاعا – 24,05 اەك نەمەسە 94 565 تەڭگە;

— 7 بالاعا – 28,06 اەك نەمەسە 110 332 تەڭگە;

— 8 جانە ودان دا كوپ بالاعا – 4 اەك نەمەسە ءار بالاعا 15 728 تەڭگە تولەنەدى.

سونىمەن قاتار, 6 جانە ودان دا كوپ بالا تۋىپ, تاربيەلەگەن, «كۇمىس القا», «التىن القا» القالارى بار نەمەسە بۇرىن «باتىر انا» اتاعىن العان, I جانە II دارەجەلى «انا داڭقى» وردەندەرىمەن ناگرادتالعان انالارعا مىناداي مولشەردە اي سايىنعى جاردەماقى تولەنەدى:

— «كۇمىس القا» القاسىمەن ماراپاتتالعان – 6,40 اەك نەمەسە 25 165 تەڭگە;

— «التىن القا» القاسىمەن ماراپاتتالعان نەمەسە بۇرىن «باتىر انا» اتاعىن العان, I جانە II دارەجەلى «انا داڭقى» وردەندەرىمەن ماراپاتتالعاندار – 7,40 اەك نەمەسە 29 097 تەڭگە.

ازاماتتاردان تەك رەسمي اقپارات كوزدەرىنەن الىنعان اقپاراتقا سەنۋىن سۇرايمىز.

جالعان اقپارات تاراتۋ زاڭ بويىنشا جاۋاپكەرشىلىككە تارتىلاتىنىن ەسكە سالامىز», — دەلىنگەن مينيسترلىك تاراتقان اقپاراتتا.