«6-dan az balasy bar otbasylar járdemaqydan aıyrylýy múmkin»: mınıstrlik aqparatqa jaýap berdi

Eńbek jáne halyqty áleýmettik qorǵaý mınıstrligi «6-dan az balasy bar kópbalaly otbasylar memlekettik járdemaqydan aıyrylýy múmkin» degen aqparatty joqqa shyǵardy, dep jazdy Qandastar.kz.

«Birqatar BAQ, aqparattyq toptar men áleýmettik jeli paraqshalarynda qoldanystaǵy zańnamaǵa sáıkes 6 jáne odan da kópbalaly otbasylar ǵana kópbalaly otbasy bolyp sanalady degen jalǵan aqparattar taralyp jatyr.

QR Eńbek jáne halyqty áleýmettik qorǵaý mınıstrligi qoldanystaǵy zańnamaǵa sáıkes 4 jáne odan da kóp kámeletke tolmaǵan balalary nemese birge turatyn 23 jasqa deıingi kúndizgi bólimde oqıtyn stýdentteri bar otbasyna kópbalaly otbasy mártebesi beriletinin habarlaıdy.

Mundaı otbasylarǵa tabysyna qaramastan aı saıynǵy járdemaqy tólenedi. Kópbalaly otbasylarǵa tólenetin tólemderdiń mólsheri balalardyń sanyna baılanysty saralanady jáne 2025 jyly:

— 4 balaǵa – 16,03 AEK nemese 63 030 teńge;

— 5 balaǵa – 20,04 AEK nemese 78 798 teńge;

— 6 balaǵa – 24,05 AEK nemese 94 565 teńge;

— 7 balaǵa – 28,06 AEK nemese 110 332 teńge;

— 8 jáne odan da kóp balaǵa – 4 AEK nemese ár balaǵa 15 728 teńge tólenedi.

Sonymen qatar, 6 jáne odan da kóp bala týyp, tárbıelegen, «Kúmis alqa», «Altyn alqa» alqalary bar nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen nagradtalǵan analarǵa mynadaı mólsherde aı saıynǵy járdemaqy tólenedi:

— «Kúmis alqa» alqasymen marapattalǵan – 6,40 AEK nemese 25 165 teńge;

— «Altyn alqa» alqasymen marapattalǵan nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen marapattalǵandar – 7,40 AEK nemese 29 097 teńge.

Azamattardan tek resmı aqparat kózderinen alynǵan aqparatqa senýin suraımyz.

Jalǵan aqparat taratý zań boıynsha jaýapkershilikke tartylatynyn eske salamyz», — delingen mınıstrlik taratqan aqparatta.