6 جاسار بالانى ۇرعان ەر ادام تاعىلعان ايىپتى مويىنداۋدان باس تارتتى

جەلىدە تاراعان ۆيدەوداعى ەر ادام – الماتى قوعامدىق كەڭەسىنىڭ مۇشەسى الەكساندر بەليانوۆ. ول وقيعاعا قاتىستى ءوز نۇسقاسىن ايتتى. قازىرگى تاڭدا ەر ادام 6 جاستاعى بالانى ۇردى دەپ ايىپتالىپ وتىر. بالانىڭ اناسى پوليتسياعا شاعىم ءتۇسىردى,  دەپ حابارلايدى Qandastar.kz اقپارات پورتالى.

الەكساندر بەليانوۆ مەيرامحاناداعى ويىن بولمەسىندە تۇسىرىلگەن ۆيدەونىڭ تولىق نۇسقاسىن ۇسىندى. ول مەيرامحانادا وزىنىڭ 5 جاستاعى ۇلىمەن بىرگە بولعانىن راستادى.

«ەكى بالا بولمە ىشىنە شاشىلىپ جاتقان زاتتاردى, ياعني شارلار مەن اعاشتان جاسالعان تەكشەلەردى بىر-بىرىنە لاقتىرا باستادى. بۇل زاتتار جان-جاققا بەيبەرەكەت ۇشىپ جاتتى. مەن ولارعا مۇنىڭ قاۋىپتى ەكەنىن, ءبىر-ءبىرىنتيىپ كەتۋى مۇمكىن ەكەنىن ەسكەرتتىم. ولار تىڭدامادى, ارى قاراي جالعاستىرا بەردى», — دەدى الەكساندر بەليانوۆ.

ونىڭ ايتۋىنشا, بالالار لاقتىرىپ ويناپ جۇرگەن زاتتاردىڭ ءبىرى ونىڭ ۇلىنا تيگەن.

ء«بىر ساتتە بالالاردىڭ ءبىرى مەنىڭ ۇلىم تۇرعان جەردەگى قوراپتان شارلاردى الا باستادى. ەكىنشىسى سول بالاعا شار لاقتىرعاندا, ول مەنىڭ ۇلىمنىڭ قۇلاعىنا ءتيدى. بالانىڭ باسىنا قانداي كۇشپەن تيگەنىن ويىنشىقتىڭ كەرى قاراي ىرشىعانىنان-اق بايقاۋعا بولادى. ادەتتە جىلامايتىن ۇلىم بۇل جولى قۇلاعىن ۇستاپ جىلادى. سۇرىنە-جىعىلا ماعان كەلدى. مەن ونى قۇشاقتاپ, ءسۇيىپ, بالالاردىڭ ادەيى ىستەمەگەنىن تۇسىندىردىم. كەيىننەن بالالار ەسكەرتۋدى قۇلاعىنا دا ىلمەگەنىن, ولار اتا-انالارىنىڭ قاراۋىنسىز جۇرگەنىن كورىپ, ۇلىمدى ولاردان قاشىق ۇستادىم. بالامنىڭ قايتا جاراقات الماسىن دەپ تىرىستىم», — دەپ ءتۇسىندىردى ول.

بەليانوۆ تەك ۇلىن ارى-بەرى ۇشىپ جاتقان ويىنشىقتاردان قورعاماق بولعانىن ايتتى.

«سەبەبى بۇل زاتتار رەتسىز ۇشىپ, ۇلىم جاققا قاراي ءتۇسىپ جاتتى. ماعان جانىندا تۇرعان بالانى ءسال شەتكە يتەرۋگە تۋرا كەلدى. سول ساتتە شاريكتەر تۇرعان قوراپتان بالا شار الماق بولعاندا, مەن ەشتەڭەنى تارتىپ العان جوقپىن, ەشكىمگە داۋىس كوتەرمەدىم, سابىرمەن ءتۇسىندىرىپ, شار تۇرعان باسقا جەردەگى قوراپتى كورسەتتىم. ولار سول جاققا بارىپ, شارلار مەن تەكشەلەرمەن وينادى. تولىق ۆيدەودا مەنىڭ ارەكەتىمنىڭ بارلىعى تەك بالامدى قورعاۋ ماقساتىندا بولعانى انىق كورىنەدى», — دەدى ەر ادام.