«600 مىڭ توننا ءونىم ىسىراپ»: جامبىل وبلىسىندا شارۋالار الا جازداي ەككەن قانت قىزىلشاسىن قايدا تاپسىرارىن بىلمەيدى

فوتو سيۋجەت كادرلارىنان

جامبىل وبلىسىندا شارۋالار الا جازداي ەككەن قانت قىزىلشاسىن قايدا وتكىزەتىنىن بىلمەي ءجۇر. ايتۋلارىنشا, ايماقتاعى زاۋىت قابىلداۋعا قاۋقارسىز. ەندى 600 مىڭ توننا ءونىم ىسىراپ بولماق. بۇل تۋرالى «Stan.kz» اقپارات اگەنتتىگى 31-ارنانىڭ «ينفورمبيۋرو» جاڭالىقتار باعدارلاماسىنا سىلتەمە جاساپ حابارلايدى.

شارۋالاردىڭ ايتۋىنشا ءونىم جينالعانمەن وتكىزەتىن جەر جوق. مەركىدەگى كاسىپورىن الدى بولسا, ءونىم تولى جۇك كولىكتەرىنە تولى.

«كۇنىگە 12-اق گەكتار وتكىزەدى ەكەنبىز. ايىنا 2,5 مىڭ گەكتاردىڭ 360 گەكتارىن عانا. وندا ءبىز 2,5 مىڭ گەكتاردى سەگىز اي وتكىزۋىمىز كەرەك قوي», – دەدى شارۋا قوجالىقتىڭ باسشىسى رابجان گاينۋدينوۆ.

وبلىس بويىنشا 600 مىڭ توننا ءونىم جينالۋ كەرەك. قازىر جامبىل, قورداي, بايزاق اۋدانىنىڭ شارۋالارى اۋىلشارۋاشىلىق باسقارماسىنىڭ الدىندا دابىل قاعىپ ءجۇر. بارلىعىندا جاۋاپتىلار ەستىسىن, ەسكەرسىن, دەر كەزىندە دەمەۋ بولسا ەكەن دەگەن تىلەك بار.

«باستايىن دەپ تۇرمىز. ءبىر دە ءبىر كاماز جوق. كامازدىڭ ءبارى مەركىدە تۇر بەس كۇن بولدى تۇر», – دەدى ولار.

بۇل ايتىلعانداردى اكىم ورىنباسارى جوققا شىعارمايدى. ول ۇكىمەتتەن جاردەم كۇتىپ وتىرعاندارىن جەتكىزدى.

«ال زاڭدى تۇردە وعان قىسىم كورسەتەتىن ءبىزدىڭ مۇمكىندىگىمىز جوق. الاي بۇلاي بولىپ قىسقارتۋ بولىپ كەتىپ, تاعى زاۋىت توقتاپ قالدى دەگەن ماسەلە بولىپ جاتسا, قىرعىزستاننىڭ زاۋىتتارىمەن كەلىسسوزدەر جۇرگىزىلىپ جاتىر», – دەدى جامبىل وبلىسى اكىمىنىڭ ورىنباسارى ءابىلحايىر تامابەك.

مەركىدەگى زاۋىتتىڭ مۇنشا مول ءونىمدى قابىلداۋعا قاۋقارى بولماي وتىر. وڭىردەگى كاسىپورىنمەن وسى ۋاقىتقا دەيىن كەزدەسۋ از بولماپتى. شەنەۋنىكتەر قىرعىز اسىپ جەتكىزسەك تە قىزىلشانى دالادا قالدىرمايمىز دەپ سەندىرۋدە.