63 اقتوبەلىكتەن شوشقا تۇماۋى انىقتالدى

فوتو: istockphoto.com

مەكتەپتەر مەن بالاباقشالاردا ەندى «فيلترلەر» ورناتىلعان, بالالاردىڭ كىرەبەرىستە دەنە قىزۋى تەكسەرىلەدى.

اقتوبە وبلىسىندا 63 ادامنان شوشقا تۇماۋى انىقتالدى, دەپ حابارلادى qandastar.kz سايتى «موي گورود» باسىلىمىنا سىلتەمە جاساپ.قازان ايىنان باستاپ اقتوبە وبلىسىندا جرۆي مەن تۇماۋ بەلگىلەرى بويىنشا 101 مىڭنان استام ادام دارىگەرگە جۇگىنگەن. سانەپيدەميولوگتاردىڭ مالىمەتىنشە, كۇزدە تۇرعىنداردىڭ تەك 14 پايىزى تۇماۋعا قارسى ەكپە سالدىرعان. ناۋقاستاردىڭ باسىم بولىگى — 14 جاسقا دەيىنگى بالالار, سونىمەن قاتار جۇكتى ايەلدەر اراسىندا دا 291 ۆيرۋس ينفەكتسياسى تىركەلگەن.

سانەپيدباقىلاۋ دەپارتامەنتى باسشىسىنىڭ ورىنباسارى مۇحتار سەرباەۆتىڭ ايتۋىنشا, پتسر ادىسىمەن 2131 ناۋقاس تەكسەرىلگەن, ونىڭ 63-ىندە ا ءتيپتى تۇماۋ (H1N1 شتامى), ياعني شوشقا تۇماۋى انىقتالعان.

جرۆي مەن تۇماۋ اسقىنۋلارىمەن قاۋىپتى, اسىرەسە ولار پنەۆمونيانى تۋدىرۋى مۇمكىن. وسىنداي دياگنوزبەن 274 ادام اۋرۋحاناعا جاتقىزىلعان, ولاردىڭ ىشىندە ءبىر جۇكتى ايەل, 208 بالا (14 جاسقا دەيىنگى) جانە 43 نارەستە بار. اۋرۋ دەڭگەيى 2,8 ەسەگە ارتقان.

مەكتەپتەر مەن بالاباقشالاردا ەندى «فيلترلەر» ورناتىلعان, بالالاردىڭ كىرەبەرىستە دەنە قىزۋى تەكسەرىلەدى.

«ا جانە ۆ ءتيپتى تۇماۋلار ەڭ اۋىر جانە ءجيى كەزدەسەدى. ا ءتيپى ينفەكتسيالىق-توكسيكالىق شوك تۋدىرىپ, ادامنىڭ ومىرىنە قاۋىپ ءتوندىرۋى, سونداي-اق جۇرەك-قان تامىر جۇيەسىن جانە تىنىس الۋ ورگاندارىن زاقىمداۋى مۇمكىن. سوندىقتان ەكپە الۋ ماڭىزدى بولدى. ۆاكتسينا جۇكتى ايەلدەرگە دە جاسالادى. بىراق بىزدە قازان ايىنان بەرى ستاتسيوناردا 109 جۇكتى ايەل ەمدەلدى, ولاردىڭ تەك ەكەۋى عانا ەكپە العان. ۆاكتسينا العاندار تۇماۋدى جەڭىل وتكەرەدى. ستاتسيونارعا تۇسكەن 45 ناۋقاستان شوشقا تۇماۋى انىقتالدى», — دەيدى اقتوبە وبلىستىق ينفەكتسيالىق اۋرۋحاناسى باس دارىگەرىنىڭ ورىنباسارى مايرا نۇرعاليەۆا.

اقتوبەلىكتەرگە ادامدار كوپ جينالاتىن ورىندارعا بارۋدى, بۇقارالىق شارالارعا قاتىسۋدى شەكتەۋگە جانە ماسكا تاعۋعا كەڭەس بەرىلدى.