«660 ميلليون دوللار شىندىققا جاناسپايتىن تسيفر»: سپورت مينيسترلىگى وليمپياداعا بولىنگەن قاراجاتتىڭ سوماسىن ايتتى

فوتو: اشىق دەرەككوز

الەۋمەتتىك جەلىدە قازاقستان ۇلتتىق قۇراما سپورتشىلارىن پاريج وليمپياداسىنا دايىنداۋعا جانە ولاردىڭ وليمپيادا ويىندارىنا قاتىسۋىنا بيۋدجەتتەن 500 (وزبەكستانمەن سالىستىرعاندا 6 ەسە كوپ) ميلليون دوللار قاراجات بولگەنى تۋرالى اقپارات تارادى. الايدا تۋريزم جانە سپورت مينيسترلىگى Stan.kz تىلشىسىنە بۇل اقپاراتتىڭ شىندىققا جاناسپايتىنىن مالىمدەدى.

جەلىدە وليپيادادان 8 التىن, 2 كۇمىس, 3 قولا مەدەل الىپ, جۇلدە سانى بويىنشا 13 ورىنعا كوتەرىلگەن وزبەكستان سپورتشىلارعا بيۋدجەتتەن 160 ميلليون دوللار ءبولدى. ال قازاقستان 660 ميلليون تەڭگە بولە تۇرا, 41 ورىنعا تۇراقتاعىنى تۋرالى اقپارات تارادى.

مينيسترلىكتىڭ مالىمەتىنشە, وزبەكستاننىڭ وليمپياداعا جۇمساعان قارجىسى دەپ كورسەتىلگەن 160 ميلليون دوللار ولاردىڭ رەسپۋبليكالىق بيۋدجەتتەن سپورتقا بولگەن سوماسى.

“قازاقستان رەسپۋبليكالىق بيۋدجەتتەن سپورتقا 2023 جىلى 61,3 ميلليارد تەڭگە قارجى ءبولدى. بۇل شامامەن 128 ميلليون اقش دوللارىنا تەڭ. اتالعان سوما رەسپۋبليكانىڭ بارلىق سپورتتىق قاجەتتىلىگىن, ونىڭ ىشىندە, وليمپيادا, وليمپيادالىق جانە وليمپيادالىق ەمەس سپورت تۇرىلەرىنەن الەم, ازيا چەمپيوناتتارى سياقتى حالىقارالىق جارىستارعا دايىندىققا جانە ۇلتتىق سپورتقا بولىنگەن. سوندىقتان «660 ميلليون دوللار» دەپ كورسەتىلگەن تسيفر شىندىققا جاناسپايتىنىن جانە بۇل قوعامدى شاتاستىراتىنىن ەسكەرتەمىز”, – دەپ مالىمدەدى ۆەدومستۆو.

ال وليمپياداعا ياعني, ۇلتتىق قۇراما كوماندانى دايارلاۋعا, سپورتشىلاردىڭ وليمپيادا ويىندارىنا قاتىسۋىنا 980 ميلليون تەڭگە جۇمسالدى.

مينيسترلىك قازاقستان دا وزگە ەلدەر سياقتى سپورتقا بولىنگەن قاراجاتتى ءتيىمدى جۇمساۋعا تىرىساتىنىن جانە سپورت سالاسىن قارجىلاندىرۋعا اسا جاۋاپكەرشىلىكپەن قارايتىنىن اتاپ ءوتتى.

سونداي-اق ۆەدومستۆو مينيسترلىك تاراپىنان كاسىبي سپورتتى دامىتۋعا قارجى بولىنبەگەنىن مالىمدەدى.