69 جاستاعى تۇركيالىق ستۋدەنت تۇركىستانعا ءتىل ۇيرەنۋگە كەلدى

فوتو: gylym_jogary_bilim

كيەلى تۇركىستان قالاسىندا ورنالاسقان احمەت ياساۋي ۋنيۆەرسيتەتى – تۇركى الەمى جاستارىنىڭ قاراشاڭىراعىنا اينالعان ءبىلىم ورداسى. مۇندا جىل سايىن دۇنيەنىڭ ءتورت بۇرىشىنداعى تۇركىتىلدەس ەلدەر مەن ۇلت وكىلدەرى كەلىپ, ءبىلىم الادى. قازىرگى تاڭدا وقۋ ورنىندا تۇركى الەمىنىڭ 17 ەلىنەن جانە 30-عا جۋىق ۇلت پەن ۇلىستان 10 مىڭعا جۋىق ستۋدەنت وقىپ جاتىر. سولاردىڭ ءبىرى – تۇركيالىق كادريە ىشىكلى. 69 جاستاعى بىلىمگەر شەكارا اسىپ, قازاق ءتىلىن ۇيرەنىپ, مادەنيەتىمەن تانىسۋ ءۇشىن تۇركىستانعا وقۋعا كەلگەن, دەپ جازدى qandastar.kz

كادريە ىشىكلى – تۇركيا ازاماتى, ستامبۋل قالاسىنىڭ تۇرعىنى, ءۇش بالانىڭ اناسى. قازىر احمەت ياساۋي ۋنيۆەرسيتەتىنىڭ دايىندىق ورتالىعىنىڭ تىڭداۋشىسى. ول – ۋنيۆەرسيتەت تاريحىنداعى ەڭ جاسى ۇلكەن ستۋدەنت اتانىپ, جاستارعا ۇلگى كورسەتىپ ءجۇر.

تۇركيالىق ستۋدەنت تۇركىستانعا كەلىپ ءبىلىم الۋىنا تۇركى ەلدەرىنىڭ ءتىلى جانە مادەنيەتى, سالت-داستۇرىمەن تانىسۋعا دەگەن قىزىعۋشىلىعى سەبەپ بولعانىن ايتادى. كادريە حانىمنىڭ قازاقستانعا كەلگەنىنە ءبىر جارىم اي بولسا دا, قازاق ءتىلىن جەتكىلىكتى دەڭگەيدە تۇسىنەتىن حالگە جەتكەن.

«قازىر قازاق ءتىلىن ۇيرەنىپ ءجۇرمىن. ماعان تۇركى ەلدەرىنىڭ مادەنيەتىمەن تانىسقان ۇنايدى. وسىندا قازاق ءتىلىن ۇيرەنىپ, مادەنيەتىمەن جاقسى تانىسىپ, سودان كەيىن وزگە دە باۋىرلاس ەلدەرگە بارعىم كەلەدى», – دەيدى ول.

كادريە ىشىكلى بۇعان دەيىن تۇركيادا «تۋريزم» ماماندىعى بويىنشا جوعارى وقۋ ورىنىن ءتامامداپ, الەمنىڭ 20-عا جۋىق ەلىنە ساياحاتتاعان. ەندىگى ماقساتى – ورتا ازيا ەلدەرىمەن تانىسۋ. سوندىقتان احمەت ياساۋي ۋنيۆەرسيتەتىندە دە «تۋريزم» ماماندىعى بويىنشا ءبىلىمىن جالعاستىرماق.

ايتا كەتەيىك, كادريە ىشىكلى ءبىلىم الىپ جۇرگەن دايىندىق ورتالىعىندا ۋنيۆەرسيتەتتىڭ ىشكى گرانتىنا (كۆوتا) يە بولعان تۇركى الەمىنەن كەلگەن ءبىلىم الۋشىلار وقيدى. ولار 2 سەمەستر بويى قازاق, تۇرىك, ورىس جانە اعىلشىن تىلدەرىن ۇيرەنەدى. بيىلعى وقۋ جىلىندا ورتالىق ۇستازدارى 200-دەن استام تىڭداۋشىعا ساباق بەرىپ ءجۇر. دايىندىق ورتالىعىن ءساتتى اياقتاعان بىلىمگەرلەر ءارى قاراي ءوزى تاڭداعان ماماندىعى بويىنشا ۋنيۆەرسيتەتتە ءبىلىمىن جالعاستىرادى.

دايىندىق ورتالىعىنىڭ ۇجىمى جاسى ۇلكەن ستۋدەنت كەلەتىنىن العاش ەستىگەن كەزدە تاڭىرقاپ, ابدىراپ قالعاندارىن جاسىرمايدى. الايدا, كادريە ىشىكلى قازاقستانعا كەلگەن بويدا بارلىعىمەن وڭاي ءتىل تابىسىپ, ورتاعا تەز قالىپتاسقان. ورتالىق وقىتۋشىلارى ونىڭ بىلىمگە اشىق, قازاق تىلىنە قىزىعۋشىلىعى جوعارى ەكەنىن اتاپ ءوتتى.

كادريە ىشىكلى ءوزىنىڭ باتىل شەشىمى ارقىلى جاستاردى ىنتالاندىرىپ, ءبىلىم الۋعا ەشقاشان كەش ەمەس ەكەنىنە كورسەتە الدى. بىرگە وقيتىن ستۋدەنتتەرمەن جاقىن ارالاسىپ, ولاردى ءوز بالاسىنداي كورىپ, قامقورلىق تانىتىپ ءجۇر. ونىڭ ومىرگە كوزقاراسى جانە بىلىمگە دەگەن ەرەكشە ىنتاسى – جاستارعا ونەگە.