69 jastaǵy túrkııalyq stýdent Túrkistanǵa til úırenýge keldi

Foto: gylym_jogary_bilim

Kıeli Túrkistan qalasynda ornalasqan Ahmet Iasaýı ýnıversıteti – Túrki álemi jastarynyń qarashańyraǵyna aınalǵan bilim ordasy. Munda jyl saıyn dúnıeniń tórt buryshyndaǵy túrkitildes elder men ult ókilderi kelip, bilim alady. Qazirgi tańda oqý ornynda túrki áleminiń 17 elinen jáne 30-ǵa jýyq ult pen ulystan 10 myńǵa jýyq stýdent oqyp jatyr. Solardyń biri – túrkııalyq Kadrıe Yshykly. 69 jastaǵy bilimger shekara asyp, qazaq tilin úırenip, mádenıetimen tanysý úshin Túrkistanǵa oqýǵa kelgen, dep jazdy qandastar.kz

Kadrıe Yshykly – Túrkııa azamaty, Stambýl qalasynyń turǵyny, úsh balanyń anasy. Qazir Ahmet Iasaýı ýnıversıtetiniń Daıyndyq ortalyǵynyń tyńdaýshysy. Ol – ýnıversıtet tarıhyndaǵy eń jasy úlken stýdent atanyp, jastarǵa úlgi kórsetip júr.

Túrkııalyq stýdent Túrkistanǵa kelip bilim alýyna túrki elderiniń tili jáne mádenıeti, salt-dástúrimen tanysýǵa degen qyzyǵýshylyǵy sebep bolǵanyn aıtady. Kadrıe hanymnyń Qazaqstanǵa kelgenine bir jarym aı bolsa da, qazaq tilin jetkilikti deńgeıde túsinetin hálge jetken.

«Qazir qazaq tilin úırenip júrmin. Maǵan túrki elderiniń mádenıetimen tanysqan unaıdy. Osynda qazaq tilin úırenip, mádenıetimen jaqsy tanysyp, sodan keıin ózge de baýyrlas elderge barǵym keledi», – deıdi ol.

Kadrıe Yshykly buǵan deıin Túrkııada «Týrızm» mamandyǵy boıynsha joǵary oqý orynyn támamdap, álemniń 20-ǵa jýyq eline saıahattaǵan. Endigi maqsaty – Orta Azııa elderimen tanysý. Sondyqtan Ahmet Iasaýı ýnıversıtetinde de «Týrızm» mamandyǵy boıynsha bilimin jalǵastyrmaq.

Aıta keteıik, Kadrıe Yshykly bilim alyp júrgen Daıyndyq ortalyǵynda ýnıversıtettiń ishki grantyna (kvota) ıe bolǵan túrki áleminen kelgen bilim alýshylar oqıdy. Olar 2 semestr boıy qazaq, túrik, orys jáne aǵylshyn tilderin úırenedi. Bıylǵy oqý jylynda ortalyq ustazdary 200-den astam tyńdaýshyǵa sabaq berip júr. Daıyndyq ortalyǵyn sátti aıaqtaǵan bilimgerler ári qaraı ózi tańdaǵan mamandyǵy boıynsha ýnıversıtette bilimin jalǵastyrady.

Daıyndyq ortalyǵynyń ujymy jasy úlken stýdent keletinin alǵash estigen kezde tańyrqap, abdyrap qalǵandaryn jasyrmaıdy. Alaıda, Kadrıe Yshykly Qazaqstanǵa kelgen boıda barlyǵymen ońaı til tabysyp, ortaǵa tez qalyptasqan. Ortalyq oqytýshylary onyń bilimge ashyq, qazaq tiline qyzyǵýshylyǵy joǵary ekenin atap ótti.

Kadrıe Yshykly óziniń batyl sheshimi arqyly jastardy yntalandyryp, bilim alýǵa eshqashan kesh emes ekenine kórsete aldy. Birge oqıtyn stýdenttermen jaqyn aralasyp, olardy óz balasyndaı kórip, qamqorlyq tanytyp júr. Onyń ómirge kózqarasy jáne bilimge degen erekshe yntasy – jastarǵa ónege.