جاڭالىقتار
7 ەلدەن 250-دەن اسا قانداس بالالار قازاقستانداعى جازعى لاگەرگە كەلدى
فوتو: «وتانداستار قورى» كەاق
25 ماۋسىم كۇنى ەتنيكالىق قازاق بالالارىنا ارنالعان «Jas Qazaq» جازعى-ەتنو لاگەرىنىڭ اشىلۋ ءوتتى,- دەپ حابارلايدى qandastar.kz, «وتانداستار قورى» كەاق ءباسپاسوز قىزمەتىنە سىلتەمە جاساپ.
قازاقستان رەسپۋبليكاسى سىرتقى ىستەر مينيسترلىگىنە قاراستى «وتانداستار قورى» كەاق ۇيىمداستىرۋىمەن جانە IQanat قورىنىڭ قولداۋىمەن رەسەي, موڭعوليا, وزبەكستان, قىرعىزستان, قىتاي, وڭتۇستىك كورەيا جانە يران ەلدەرىنەن 250-گە جۋىق ەتنيكالىق قازاق بالالارىنىڭ باسىن بىرىكتىرەتىن بۋرابايداعى «Jas Qazaq» جازعى-ەتنو لاگەر جۇمىسىن باستادى.
وتانداستار قورىنىڭ «Jas Qazaq» جازعى ەتنو-لاگەرى ءتورتىنشى رەت ۇيىمداستىرىلىپ جاتىر. وسىعان دەيىن 400-دەن اسا قانداس بالالار قاتىسسا, بيىل رەسەي, موڭعوليا, وزبەكستان, قىرعىزستان, قىتاي, وڭتۇستىك كورەيا جانە يران ەلدەرىنەن كەلگەن 255 ەتنيكالىق قازاق بالالارىنىڭ باسىن قوستى. قاتىسۋشىلاردىڭ اراسىندا توتەنشە جاعداي كەزىندە قازاقستاندىق دوستارىنا جىلۋ جيناعان موڭعوليالىق قازاق بالالارى, قوعامنىڭ ءتۇرلى بايقاۋلارىنا قاتىسىپ, بىلىمدەرى مەن بىلىكتىلىكتەرىن دالەلدەگەن قاراكوز قانداستارىمىز بار.
لاگەر 2024 جىلعى 24 ماۋسىم جانە 7 شىلدە ارالىعىندا بۋرابايداعى «IQanat High School of Burabay» مەكتەبى بازاسىندا وتەدى. بالالار ەكى اپتادا قازاق ءتىلى, تاريحى مەن سالت-ءداستۇرىن ۇيرەنىپ, ۇلتتىق ويىندار مەن مۋزىكالىق اسپاپتاردا وينايدى, اتقا ءمىنىپ, كيىز ءۇي قۇرادى, ەلىمىزدەگى جوعارى وقۋ ورىندارىنىڭ قاتىسۋىمەن وتەتىن ءبىلىم كورمەسىنە قاتىسادى جانە ەڭ باستىسى الەمنىڭ كوپتەگەن ەلىنەن دوستار تابادى
25 ماۋسىم كۇنى لاگەردىڭ رەسمي اشىلۋ سالتاناتىنا قر پارلامەنتى ءماجىلىسىنىڭ دەپۋتاتتارى بولات كەرىمبەك جانە نۇرگۇل تاۋ, روسسوترۋدنيچەستۆونىڭ استاناداعى وكىلدىك باسشىسى ولگا فيلونوۆا, «وتانداستار قورى» كەاق پرەزيدەنتى دانيار قادىروۆ جانە IQanat مەكتەبىنىڭ ديرەكتورى زايكەن جانات قاتىسىپ, بالالارعا اقجارما تىلەكتەرىن ءبىلدىردى.
