7 elden 250-den asa qandas balalar Qazaqstandaǵy jazǵy lagerge keldi

Foto: «Otandastar qory» KEAQ

25 maýsym kúni etnıkalyq qazaq balalaryna arnalǵan «Jas Qazaq» jazǵy-etno lageriniń ashylý ótti,- dep habarlaıdy  qandastar.kz, «Otandastar qory» KEAQ baspasóz qyzmetine silteme jasap.

Qazaqstan Respýblıkasy Syrtqy ister mınıstrligine qarasty «Otandastar qory» KEAQ uıymdastyrýymen jáne IQanat qorynyń qoldaýymen Reseı, Mońǵolııa, О́zbekstan, Qyrǵyzstan, Qytaı, Ońtústik Koreıa jáne Iran elderinen 250-ge jýyq etnıkalyq qazaq balalarynyń basyn biriktiretin Býrabaıdaǵy «Jas Qazaq» jazǵy-etno lager jumysyn bastady.

Otandastar qorynyń «Jas Qazaq» jazǵy etno-lageri tórtinshi ret uıymdastyrylyp jatyr. Osyǵan deıin 400-den asa qandas balalar qatyssa, bıyl Reseı, Mońǵolııa, О́zbekstan, Qyrǵyzstan, Qytaı, Ońtústik Koreıa jáne Iran elderinen kelgen 255 etnıkalyq qazaq balalarynyń basyn qosty. Qatysýshylardyń arasynda tótenshe jaǵdaı kezinde qazaqstandyq dostaryna jylý jınaǵan mońǵolııalyq qazaq balalary, Qoǵamnyń túrli baıqaýlaryna qatysyp, bilimderi men biliktilikterin dáleldegen qarakóz qandastarymyz bar.

Lager 2024 jylǵy 24 maýsym jáne 7 shilde aralyǵynda Býrabaıdaǵy «IQanat High School of Burabay» mektebi bazasynda ótedi. Balalar eki aptada qazaq tili, tarıhy men salt-dástúrin úırenip, ulttyq oıyndar men mýzykalyq aspaptarda oınaıdy, atqa minip, kıiz úı qurady, elimizdegi joǵary oqý oryndarynyń qatysýymen ótetin bilim kórmesine qatysady jáne eń bastysy álemniń kóptegen elinen dostar tabady

25 maýsym kúni lagerdiń resmı ashylý saltanatyna QR Parlamenti Májilisiniń depýtattary Bolat Kerimbek jáne Nurgúl Taý, Rossotrýdnıchestvonyń Astanadaǵy ókildik basshysy Olga Fılonova, «Otandastar qory» KEAQ prezıdenti Danııar Qadyrov jáne IQanat mektebiniń dırektory Zaıken Janat qatysyp, balalarǵa aqjarma tilekterin bildirdi.