7-سىنىپتىڭ گەوگرافيا كىتابىندا قازاقستاننىڭ جەرى رەسەي-ەۋرازيا اۋماعى دەپ كورسەتىلگەن

جەلىدە 7- سىنىپتىڭ گەوگرافيا كىتابىنداعى دۇنيەجۇزىلىك كارتاسىنا بايلانىستى داۋ شىقتى, دەپ حابارلايدى Qaz365.kz ءتىلشىسى 31-ارنانىڭ ينفورمبيۋرو جاڭالىقتار باعدارلاماسىنا سىلتەمە جاساپ.

جەلى قولدانۋشىسى گەوگرافيا كىتابىنداعى كارتادا قازاقستاننىڭ ورنالاسقان اۋماعى دۇرىس كورسەتىلمەگەنىن ايتادى. سوزىنشە, ەلىمىز رەسەي-ەۋرازيالىق ايماققا ەنگىزىلگەن. بۇل كوپتىڭ اشۋىنا ءتيىپ, ۆيدەو قىزۋ تالقىعا تۇسكەن.

رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعىنىڭ ماماندارى 7-سىنىپقا ارنالعان «گەوگرافيا» وقۋلىعى 2017 جىلدان بەرى قولدانىستا ەكەنىن ايتتى. سوزدەرىنشە, «اتامۇرا» باسپاسىنان شىققان كىتاپتا كسرو-نىڭ ىدىراۋى كەزىندە پايدا بولعان جاڭا تاۋەلسىز مەملەكەتتەردىڭ گەوگرافيالىق ورنىن بەلگىلەۋ ءۇشىن «رەسەي-ەۋرازيالىق ايماق» اتاۋى قولدانىلعان. ولار بۇل وزگەرىپ كەلە جاتقان الەمنىڭ تاريحي-مادەني اۋداندارىنىڭ سىزبا-كارتاسى دەپ ءتۇسىندىردى.

“2018 جىلدان باستاپ بىرىككەن ۇلتتار ۇيىمى ورتالىق ازيانى تاۋەلسىز ايماق رەتىندە بولەدى. وسىعان وراي, كەيىنگى باسىلىمداردا كورسەتىلگەن سىزباعا ءتيىستى جاڭارتۋلار ەنگىزىلەدى. قازىرگى ۋاقىتتا كەيبىر دەرەكتەردىڭ, ستاتيستيكالىق مالىمەتتەردىڭ جاڭارتىلۋىنا بايلانىستى اتالعان وقۋلىق مازمۇنىنا وزگەرىستەر مەن تولىقتىرۋلار ەنگىزىلىپ جاتىر. كەلەسى 2025-2026 وقۋ جىلىندا وقۋلىق قايتا باسىلىپ شىعارىلادى”, – دەپ مالىمدەدى وقۋ-اعارتۋ مينيسترلىگى رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعىنىڭ ءباسپاسوز قىزمەتى.