7-synyptyń geografııa kitabynda Qazaqstannyń jeri Reseı-Eýrazııa aýmaǵy dep kórsetilgen

Jelide 7- synyptyń geografııa kitabyndaǵy dúnıejúzilik kartasyna baılanysty daý shyqty, dep habarlaıdy Qaz365.kz tilshisi 31-arnanyń Informbıýro jańalyqtar baǵdarlamasyna silteme jasap.

Jeli qoldanýshysy geografııa kitabyndaǵy kartada Qazaqstannyń ornalasqan aýmaǵy durys kórsetilmegenin aıtady. Sózinshe, elimiz Reseı-Eýrazııalyq aımaqqa engizilgen. Bul kóptiń ashýyna tıip, vıdeo qyzý talqyǵa túsken.

Respýblıkalyq ǵylymı-praktıkalyq bilim mazmunyn saraptaý ortalyǵynyń mamandary 7-synypqa arnalǵan «Geografııa» oqýlyǵy 2017 jyldan beri qoldanysta ekenin aıtty. Sózderinshe, «Atamura» baspasynan shyqqan kitapta KSRO-nyń ydyraýy kezinde paıda bolǵan jańa táýelsiz memleketterdiń geografııalyq ornyn belgileý úshin «Reseı-Eýrazııalyq aımaq» ataýy qoldanylǵan. Olar bul ózgerip kele jatqan álemniń tarıhı-mádenı aýdandarynyń syzba-kartasy dep túsindirdi.

“2018 jyldan bastap Birikken Ulttar Uıymy Ortalyq Azııany táýelsiz aımaq retinde bóledi. Osyǵan oraı, keıingi basylymdarda kórsetilgen syzbaǵa tıisti jańartýlar engiziledi. Qazirgi ýaqytta keıbir derekterdiń, statıstıkalyq málimetterdiń jańartylýyna baılanysty atalǵan oqýlyq mazmunyna ózgerister men tolyqtyrýlar engizilip jatyr. Kelesi 2025-2026 oqý jylynda oqýlyq qaıta basylyp shyǵarylady”, – dep málimdedi oqý-aǵartý mınıstrligi respýblıkalyq ǵylymı-praktıkalyq bilim mazmunyn saraptaý ortalyǵynyń baspasóz qyzmeti.