جاڭالىقتار
7 جاسار بالانى 12-قاباتتان لاقتىرماق بولعان: استانالىق وقۋشىلاردىڭ اتا-انالارى جازالانادى
فوتو: اشىق دەرەككوز
استانادا 7 جاسار بالانى تۇرعىن ءۇي كەشەنىنىڭ بالكونىنان لاقتىرماق بولعان مەكتەپ وقۋشىلارىنىڭ اتا-انالارى جازالانادى. بۇل تۋرالى qandastar.kz Kznews.kz اقپارات اگەنتتىگىنە سىلتەمە جاساپ حابارلايدى.
بۇعان دەيىن استانادا ءبىر اۋلانىڭ بالالارى دوستارىن ءۇيدىڭ 12-قاباتىنان لاقتىرىپ جىبەرمەك بولعانى تۋرالى جازعان ەدىك.
پوليتسيا وقيعاعا قاتىسى بار وقۋشىلاردىڭ جەكە باسىن انىقتىدى. قازىر ءىس شەشىم قابىلداۋ ءۇشىن سوتقا جىبەرىلگەن.
«زاڭدى وكىلدەرىنە قاتىستى اكىمشىلىك حاتتاما تولتىرىلدى, جيناقتالعان ماتەريال شەشىم قابىلداۋ ءۇشىن سوتقا جىبەرىلدى. استانا پوليتسياسى زاڭدى وكىلدەرگە كامەلەتكە تولماعانداردى تاربيەلەۋ بويىنشا مىندەتتەرىن تيىسىنشە ورىنداماعانى ءۇشىن جاۋاپكەرشىلىك قاراستىرىلعانىن ەسكەرتەدى», – دەلىنگەن حابارلامادا.
وقيعاعا قاتىستى استانا قالالىق ءبىلىم باسقارماسى دا مالىمدەمە جاسادى. باسقارمانىڭ مالىمەتىنشە, بالالار پرانك-ۆيدەو تۇسىرمەك بولعان.
“بالالاردىڭ سوزىنشە ولار پرانك-ۆيدەو تۇسىرگىسى كەلگەن. وسىلايشا ولار كوڭىل كوتەرىپ, ءوز ارەكەتتەرىنىڭ قاۋىپتى ەكەنىن تۇسىنبەگەن. اتا-انالارمەن ءتۇسىندىرۋ جۇمىستارى جۇرگىزىلدى, بالالارمەن پسيحولوگتار جۇمىس ىستەۋدە. اتا-انالار زارداپ شەككەن تاراپتان كەشىرىم سۇراپ, تۇسىندىرمە حات جازىپ, پسيحولوگتاردىڭ جۇمىسىنا كەلىسىمىن بەردى”, – دەلىنگەن حابارلامادا.
ەسكە سالساق, بۇعان دەيىن شىمكەنتتە شىمكەنتتە اعاسى ءبۇلدىرشىندى 4-قاباتتان لاقتىرىپ جىبەرىپ, بالانىڭ كوز جۇمعانى تۋرالى جازعان ەدىك.
