70 مىڭ تەڭگەنىڭ شوكولادىن ۇرلاعان قازاقستاندىق سوت زالىندا بوساتىلدى

فوتو:كوللاج Stan.kz

«Merci» جانە «قازاقستان» شوكولادتارىن ۇرلاماق بولعان جەزقازعان تۇرعىنىن سۋپەرماركەت اكىمشىلىگىنىڭ وكىلدەرى سوت زالىندا كەشىردى. بۇل تۋرالى  qandastar.kz  Stan.kz اقپارات اگەنتتىگىنە سىلتەمە جاساپ حابارلايدى.

ەر ادامعا قىلمىستىق كودەكستىڭ 24-بابىنىڭ 3-بولىگى (قىلمىسقا دايىندالۋ جانە قىلمىسقا وقتالۋ), قىلمىستىق كودەكستىڭ 188-بابىنىڭ 1-بولىگى (ۇرلىق) بويىنشا قىلمىس جاسادى دەگەن ايىپ تاعىلدى.

«2024 جىلدىڭ 14 جەلتوقسانىندا ازامات ە, «س» سۋپەرماركەتىندە جۇمىسشىلاردىڭ جوعىن پايدالانىپ, جالپى سوماسى 71 544 تەڭگە بولاتىن «قازاقستان» ماركالى 33 جانە «Merci» ماركالى 22 شوكولادتى جاسىرىن تۇردە ۇرلاپ كەتكەن. الايدا سۋپەرماركەتتەن شىعىپ بارا جاتقاندا كۇزەتشىلەر توقتاتىپ, ۇرلانعان زاتتاردى الىپ قالعان», – دەلىنگەن سوت حابارلاماسىندا.

ەر ادام ءوز كىناسىن تولىق مويىنداپ, جاساعان ارەكەتىنە وكىندى. جابىرلەنۋشى تاراپ جاۋاپكەرمەن تاتۋلاسقانىن جانە قوسىمشا تالاپتاردان باس تارتقانىن حابارلادى. ناتيجەسىندە سوت قىلمىستىق ءىستى قىسقارتىپ, ازامات قىلمىستىق جاۋاپكەرشىلىكتەن بوساتىلدى.

قاۋلى زاڭدى كۇشىنە ەندى.

ايتا كەتەيىك, بۇعان دەيىن استانادا دۋباي شوكولادىن ساتىپ ادامداردى الداعان الاياق 3 جىلعا سوتتالعانى تۋرالى جازعان ەدىك.