الەم جاڭالىقتارىجاڭالىقتار
ماسكەۋ سوتى ەكى قازاقستاندىقتى تەمىرجولعا ديۆەرسيا جاساعانى ءۇشىن 13 جىلعا سوتتادى
فوتو: ەگەمەن.كز
ماسكەۋ قالالىق سوتى قازاقستان ازاماتتارى الەكساندر ابرام مەن ەدۋارد بۋرديلوۆتى الدىن الا ءسوز بايلاسۋ ارقىلى تەمىرجولعا ديۆەرسيا جاساعانى ءۇشىن 13 جىلعا باس بوستاندىعىنان ايىردى. بۇل تۋرالى Stan.kz اقپارات اگەنتتىگى مەديازونا باسىلىمىنا سىلتەمە جاساپ حابارلايدى.
قازاقستان ازاماتتارى الەكساندر ابرام مەن ەدۋارد بۋرديلوۆ 2023 جىلى 22 ماۋسىمدا ۇستالعان ەدى. ولارعا رەسەي تەمىر جولىندا ديۆەرسيا (وندىرىستىك نىسانداردى جارامسىز ەتۋ, جۇمىس كۇشى مەن قۇرال-جابدىقتارىنا زيان كەلتىرۋ) جاسادى دەگەن ايىپ تاعىلدى.
ماسكەۋ سوتى سوتتالۋشىدان «رەسەي تەمىر جولى» كومپانياسىنىڭ پايداسىنا 387 مىڭ رۋبل (شامامەن 2 100 000 تەڭگە) شىعىن ءوندىرۋ تۋرالى شەشىم قابىلدادى. پروكۋرور ولارعا 13 جىل باس بوستاندىعىنان ايىرۋدى سۇرادى. اقىرى سوت وسى مەرزىمگە تاعايىندادى.
ابرام تورت جىلىن تۇرمەدە, ال قالعان توعىزىن قاتاڭ رەجيمدەگى كولونيادا وتەيدى. بۋرديلوۆ 13 جىلىنىڭ بەسەۋىن تۇرمەدە, سەگىز جىلىن قاتاڭ رەجيمدەگى كولونيادا وتەيدى.
«رەسەي تەمىر جولى» اق ازاماتتىق تالاپ ارىزى تولىق كولەمدە قاناعاتتاندىرىلدى.
