Máskeý soty eki qazaqstandyqty temirjolǵa dıversııa jasaǵany úshin 13 jylǵa sottady

Foto: Egemen.kz

Máskeý qalalyq soty Qazaqstan azamattary Aleksandr Abram men Edýard Býrdılovty aldyn ala sóz baılasý arqyly temirjolǵa dıversııa jasaǵany úshin 13 jylǵa bas bostandyǵynan aıyrdy. Bul týraly Stan.kz aqparat agenttigi Medıazona basylymyna silteme jasap habarlaıdy.

Qazaqstan azamattary Aleksandr Abram men Edýard Býrdılov 2023 jyly 22 maýsymda ustalǵan edi. Olarǵa Reseı temir jolynda dıversııa (óndiristik nysandardy jaramsyz etý, jumys kúshi men qural-jabdyqtaryna zııan keltirý) jasady degen aıyp taǵyldy.

Máskeý soty sottalýshydan «Reseı temir joly» kompanııasynyń paıdasyna 387 myń rýbl (shamamen 2 100 000 teńge) shyǵyn óndirý týraly sheshim qabyldady. Prokýror olarǵa 13 jyl bas bostandyǵynan aıyrýdy surady. Aqyry sot osy merzimge taǵaıyndady.

Abram tórt jylyn túrmede, al qalǵan toǵyzyn qatań rejımdegi kolonııada óteıdi. Býrdılov 13 jylynyń beseýin túrmede, segiz jylyn qatań rejımdegi kolonııada óteıdi.

«Reseı temir joly» AQ azamattyq talap aryzy tolyq kólemde qanaǵattandyryldy.