«90 مىڭ تەڭگە شىعىندارىن وتەمەيدى»: قازاقستاندىق دەپۋتات جاستاردى جۇمىسقا ورنالاستىراتىن مەملەكەتتىك باعدارلاما ايلىعىن سىنعا الدى

فوتو: سەنات وتىرىسىنان

دەپۋتات بيبىگۇل اققوجينا بۇگىندە “العاشقى جۇمىس”, “جاستار پراكتيكاسى” سياقتى مەملەكەتتىك باعدارلامالاردىڭ تولەيتىن ايلىعىن سىنادى, دەپ جازدى qandastar.kz

ايتۋىنشا بۇل جاستاردىڭ ەڭ قاراپايىم كۇندەلىكتى شىعىندارىن دا وتەۋگە جەتپەيدى. بۇل تۋرالى Stan.kz اقپارات اگەنتتىگى حابارلايدى.

دەپۋتتاتىڭ ايتۋىنشا, قازىرگى ۋاقىتتا “جاستار پراكتيكاسى” جانە “العاشقى جۇمىس ورنى” باعدارلامالارى بويىنشا ەڭبەكاقى مولشەرى وتە تومەن.

“سوڭعى ءوسىم 2022 جىلى 20-دان 30 اەك-كە ۇلعايعان. بۇل رەتتە قاتىسۋشىلار ءۇشىن قولعا تۇسەتىن تولەمنىڭ ناقتى مولشەرى 90 511 تەڭگەنى قۇرايدى. بۇگىنگى تاڭدا ينفلياتسيالىق قۇبىلىستارعا قاراماستان باعدارلاما قاتىسۋشىلارىنىڭ جالاقى دەڭگەيى وزگەرىسسىز قالىپ وتىر. جاستار اسىرەسە الەۋمەتتىك وسال ساناتتاعى اتا-اناسىنىڭ قولداۋى جوق تۇلەكتەر قازىرگى تولەم دەڭگەيىمەن تۇرعىن ءۇي, تاماقتانۋ شىعىندارىن وبەكتيۆتى تۇردە جابا المايدى. ناتيجەسىندە كوپتەگەن ادامدار قاتىسۋدان باس تارتىپ, بەيرەسمي جۇمىس ىزدەۋگە ءماجبۇر”, – دەدى ول.

بيبىگۇل اققوجينا سالدارىنان كوپتەگەن جاستار بۇلاي جۇمىسقا ورنالاسۋدان باس تارتاتىنىن العا تارتتى.

“ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتىنا سايكەس ەكى جوباعا قاتىسقان جاستارىمزدىڭ 23 پايىزى عانا جۇمىسقا ورنالاستىرىلدى. قولدانىستاعى شارتتار, سونىڭ ىشىندە جالاقىنىڭ تومەن دەڭگەيى ءتيىستى موتيۆاتسيانى بەرمەيدى. وسىلايشا تولەمنىڭ تومەن دەڭگەيى جاستاردى ەڭبەك نارىعىنا تارتۋعا, ولاردىڭ كاسىبي قالىپتاسۋىنا جاعداي جاساۋعا باعىتتالعان مەملەكەتتىك جاستار ساياساتىنىڭ ماقساتتارىنا قايشى كەلەدى. جەكە سەكتور ءتىپتى بىلىكتىلىگى جوق جۇمىسشىلار ءۇشىن دە جوعارى جالاقىنى ۇسىناتىنىن ەسكەرۋ قاجەت. بۇل جاستاردىڭ مەملەكەتتىك باعدارلامالارعا دەگەن قىزىعۋشىلىعىن ودان ءارى تومەندەتەدى. ەل پرەزيدەنتى قاسىم-جومارت كەمەل ۇلى توقاەۆ جۋىردا جاريالاعان جولداۋىندا جىل سايىن بىزدە مىڭداعان ينجەنەرلەر, قۇرىلىسشىلار, اۋىل شارۋاشىلىعى ماماندارى وقۋلارىن ءبىرتىرىپ شىعاتىنىن ايتتى. ولاردى وقىتۋعا مەملەكەت قوماقتى قاراجات بولەدى.. دەگەنمەن ولار كاسىبي ماماندىقتارى بويىنشا جۇمىس ىستەمەيدى. ءبارى تەز تابىس اكەلەتىن جۇمىس تاڭدايدى”, – دەدى ول.

دەپۋتات وسى تۇستا جاستاردى مۇنداي جوبالارعا تارتۋ ءۇشىن جاعداي جاساۋ كەرەك ەكەنىن كورسەتتى.

“جاستار پراكتيكاسى” “العاشقى جۇمىس ورنى” جوبالارىنا قاتىسۋشىلاردىڭ جالاقىسىن ارتتىرۋ مۇمكىندىگىن, جاستار ءۇشىن اتالعان جوبالاردىڭ تيىمدىلىگى مەن تارتىمدىلىعىن ارتتىرۋ قاجەتتىلىگىن ەسكەرە وتىرىپ, قاراستىرۋدى سۇرايمىز. ەڭبەكاقى دەڭگەيىن تولەۋدى ۇلعايتۋ, جاستاردىڭ باعدارلامالارعا دەگەن قىزىعۋشىلىعىن ارتتىرۋعا مۇمكىندىك بەرىپ, ەلىمىزدىڭ ادامي كاپيتالىن ارتتىرۋعا ۇلەس قوسادى”, – دەپ قورىتتى ول.