92 جىلعا سوتتالدى: قاتىگەز اكە ءۇش ايلىق ءسابيدى تۇنشىقتىرىپ ءولتىردى

اقش-تىڭ ينديانا شتاتىنداعى لافايەتت قالاسىندا ەر ادام ءۇش ايلىق ۇلىن قاتىگەزدىكپەن ءولتىردى. ول ءسابيدى كىر جۋعىش ۇنتاق سالىنعان شەلەككە باتىرىپ جىبەرگەن, دەپ حابارلايدى Qandastar.kz سايتى Local12 پورتالىنا سىلتەمە جاساپ.
2024 جىلدىڭ 10 تامىزىندا تۇرمىستىق زورلىق-زومبىلىق بەلگىلەرى بار ايەل دارىگەرلەردەن كومەك سۇراعان. دارىگەرلەر دەرەۋ پوليتسيا شاقىرعان. قۇقىق قورعاۋ ورگاندارىنا ايەل 29 جاستاعى كۇيەۋىنىڭ مونتيروۆكا مەن گاەچنىي كىلتپەن شابۋىل جاساپ, سوققىعا جىققانىن ايتقان. بىراق ول كەزدە ايەل ءۇشىن باستى ۋايىم – ءوز دەنساۋلىعى ەمەس, كۇيەۋىنىڭ ءۇش ايلىق ۇلىن بەلگىسىز جاققا الىپ كەتكەنى بولعان.

پوليتسيا ەر ادامنىڭ ءۇيىن تىنتكەنمەن, بالانى تاپپاعان. كۇيەۋى ءسابيدىڭ جوعالۋىنا قاتىسى بارىن مويىنداماعان, تەك ايەلىنە شابۋىل جاساعانىن عانا راستاعان. كەلەسى كۇنى بيلىك وكىلدەرى ءۇيدى قايتا تەكسەرىپ, بۇل جولى اس ۇيدەن سارعىلت شەلەكتى تاپقان. شەلەك ىشىندەگى ۇنتاق ارالاس سۋ بەتىندە ءولى بالا قالقىپ جۇرگەن. ساراپتاما ناتيجەسىندە بالانىڭ ولىمىنە — سابىندى سۋعا باتىرىپ, تۇنشىقتىرۋ سەبەپ بولعانى انىقتالعان.

وكرۋگتىڭ پروكۋرور ورىنباسارى ەليس مەديگاننىڭ ايتۋىنشا, ەر ادام كەيىنىرەك قىلمىسىن مويىنداپ, ونىڭ سەبەبىن تۇسىندىرگەن.

«ايىپتالۋشى بۇل ارەكەتى ارقىلى ايەلىنە جانە جالپى بارلىق ايەلگە ساباق بەرگىسى كەلگەنىن ايتتى. ول ەر ادامداردى قۇرمەتتەمەۋگە بولمايتىنىن كورسەتكىسى كەلىپتى», – دەدى مەديگان.

جاريالانعان مالىمەتكە سايكەس, نارەستەنى ءولتىرىپ, ايەلىن ولتىرۋگە وقتالعانى ءۇشىن ەر ادام 92 جىلعا باس بوستاندىعىنان ايىرىلدى.