ەرمەك ساعىمباەۆ ەلىمىزدە قانداي تەراكتتىڭ الدى الىنعانىن ايتتى

فوتو پرەسس-سلۋجبى كنب

ۇلتتىق قاۋىپسىزدىك كوميتەتىنىڭ توراعاسى ەرمەك ساعىمباەۆ كاسىبي مەرەكە قارساڭىندا قازاقپارات اگەنتتىگىنە سۇحبات بەرگەن بولاتىن. مۇندا ول ەلىمىزدە قانداي تەراكتىلەردىڭ الدىن الىنعانىن ايتىپ, قازاقستاندىقتارعا قاتىستى دەرەكتەردىڭ تاراپ كەتۋىنە قاتىستى  پىكىر ءبىلدىردى. qandastar.kz ساعىمباەۆ كوتەرگەن ماسەلەلەردى تالداپ كوردى.

كوميتەت توراعاسىنىڭ ايتۋىنشا, بيىل لاڭكەستىك قىلمىس جاساعانى ءۇشىن 32 ادام سوتتالىپ, 23-ءى ۇستالدى, 170 ءدىني راديكالعا ەلگە كىرۋگە تىيىم سالىندى.

سونىمەن قاتار اقتاۋدا العاشقى لاڭكەستىك ارەكەتتىڭ جولى كەسىلگەن.

«قالا تۇرعىندارىنىڭ ءبىرى راديكالدى ءدىني يدەولوگيانى ۇستانۋشى رەتىندە كوزگە ءتۇستى. ول كىسى ولتىرگەنى ءۇشىن سوتتالعان ەكەن. عالامتورداعى شەتەلدىك سودىرلاردىڭ ۇگىت-ناسيحاتىنىڭ اسەرىنەن مەملەكەتتىك ورگانداردىڭ ءبىرىنىڭ عيماراتىندا جارىلىس جاساماق بولعان.

جارىلعىش قۇرىلعىنى جاساۋعا ارنالعان كومپونەنتتەردى, سونىڭ ىشىندە جانعىش جانە باسقا حيميالىق قوسپالاردى ساتىپ العان. ءۇيىن ءتىنتۋ بارىسىندا جارىلعىش زاتتار سالىنعان ءتورت كونتەينەر جانە لاڭكەستىك ارەكەتكە دايىندىق فاكتىسىن دالەلدەيتىن باسقا دا ايعاقتار تابىلىپ, تاركىلەندى. بۇعان قوسا شەتەلدە دە ەكىنشى لاڭكەستىك ارەكەتكە توسقاۋىل قويىلدى», – دەدى ە.ساعىمباەۆ.

كوميتەت توراعاسى كيبەرقاۋىپسىزدىككە قاتىستى نە دەيدى?

«قازاقستاندا «كيبەرششيت» جۇيەسى 2018 جىلدان بەرى جۇمىس ىستەيدى. سوڭعى ءبىر جىلدا ينتەرنەتتىڭ قازاقستاندىق سەگمەنتىنە 220 ميلليوننان استام جەلىلىك شابۋىل جاسالىپ, وعان تويتارىس بەرىلگەن دەگەن دەرەك بار.

«قازاقستان ازاماتتارىنىڭ جەكە دەرەكتەرىنىڭ تارالىپ كەتۋىنە قاتىستى جۇمىستار ءوز دەڭگەيىندە جۇرگىزىلدى», – دەيدى ول.

ۇلتتىق قاۋىپسىزدىك كوميتەتى مەملەكەتتىك ورگانداردى ەكونوميكاداعى پروبلەمالار تۋرالى حاباردار ەتەدى. سونىڭ اسەرىنەن بيىلعى جىلى 1 تريلليون تەڭگەدەن استام شىعىننىڭ الدىن الۋعا مۇمكىندىك بولعان.