جاڭالىقتار
اباي وبلىسىندا 7 جاستاعى بالانى ىزدەپ تاپقان پوليتسەيلەر ماراپاتتالدى
وبلىس اكىمى بەرىك ءۋالي سەمەيلىك 7 جاستاعى بالانى تاپقان پوليتسيا قىزمەتكەرلەرىن قابىلدادى. ايماق باسشىسى اباي وبلىسى پوليتسيا دەپارتامەنتى زاتون پوليتسيا ءبولىمىنىڭ ۋچاسكەلىك ينسپەكتورلارى بەكەن اسىل مەن دارحان جۇماعاليەۆكە كورسەتكەن باتىلدىعى مەن كاسىبي شەبەرلىگى ءۇشىن العىس حات تابىستاپ, ولاردىڭ ارەكەتى بارشاعا ۇلگى ەكەنىن اتاپ ءوتتى.
«بۇگىن – قوس مەرەكە. تەك مەملەكەتتىك قىزمەتشىلەر كۇنى عانا ەمەس, قازاقستان رەسپۋبليكاسىنىڭ پوليتسيا كۇنى. سىزدەردى ەڭ اۋەلى كاسىبي مەرەكەلەرىڭىزبەن قۇتتىقتايمىن. ۇيىنەن شىعىپ كەتىپ, جوعالىپ كەتكەن 7 جاستاعى بالانى اتا-اناسىمەن امان-ەسەن قاۋىشتىرىپ, ۇلكەن ەرلىك جاسادىڭىزدار. قيىن ساتتە باتىلدىق تانىتىپ, ءوز مىندەتتەرىڭىزگە ادال ەكەندىكتەرىڭىزدى تاعى ءبىر مارتە دالەلدەدىڭىزدەر. بالانى ىزدەۋگە اتسالىسقان پوليتسيا, توتەنشە جاعدايلار قىزمەتى, ەرىكتىلەر مەن بارلىق تۇرعىندارعا اكىمدىكتىڭ اتىنان, حالىقتىڭ اتىنان ريزاشىلىعىمدى بىلدىرەمىن. سىزدەردىڭ جاناشىرلىقتارىڭىز – ادام ومىرىنە دەگەن شىنايى قامقورلىقتىڭ جارقىن ۇلگىسى», – دەدى ايماق باسشىسى.
ەسكە سالا كەتەيىك, 2025 جىلعى 21 ماۋسىمدا 2018 جىلى تۋعان امانعالي بەكبولات سەمەي قالاسىنداعى ۇيىنەن شىعىپ كەتىپ, قايتا ورالماعان. حابار تۇسكەن ساتتەن باستاپ ىزدەستىرۋ جۇمىستارىنا 1000-نان استام ادام جۇمىلدىرىلدى. بالانى ىزدەۋگە پوليتسيا, توتەنشە جاعدايلار قىزمەتى, ۇلتتىق ۇلان, ەرىكتىلەر مەن تۇرعىندار بەلسەندى اتسالىستى.
22 ماۋسىم كۇنى تاڭەرتەڭ بالا ۇيىنەن شامامەن 10 شاقىرىم جەردەگى ورمان القابىنان امان-ەسەن تابىلدى.
