Abaı oblysynda múgedek balalarǵa tıesili tólemder berilmeı kelgen

Abaı oblysynda Prokýratýra erekshe qajettilikteri bar balalardyń quqyǵy buzylǵanyn anyqtady, dep habarlaıdy Qandastar.kz aqparattyq portaly.

Borodýlıha aýdanynyń prokýratýrasy psıhıkalyq jáne minez-qulyq aýytqýlary bar balalardyń quqyqtaryn saqtaý máseleleri boıynsha tekseris júrgizdi.

Qoldanystaǵy zańnamaǵa sáıkes, atalǵan dıagnozy bar kámeletke tolmaǵan balalar aıyna 7 AEK (27 524 teńge) kóleminde áleýmettik kómek alýǵa quqyly.

Alaıda aýdan aýrýhanasynda esepte turǵan 80 balanyń bireýi de tıisti áleýmettik kómekti almaı kelgen.

Anyqtalǵan buzýshylyqtar aýdandyq jumyspen qamtý jáne áleýmettik baǵdarlamalar bóliminiń balalardyń zańdy ókilderin materıaldyq kómek alý múmkindigi týraly habardar etpeýine baılanysty boldy.

Aýdan prokýratýrasynyń usynýymen ýákiletti organ balalardyń ata-analarymen jáne zańdy ókilderimen túsindirý jumystaryn júrgizip, áleýmettik tólemder alýǵa ótinishter qabyldandy.

Qazirgi tańda muqtaj balalarǵa qosymsha qarjy bólý úshin bıýdjettik ótinim joldandy.