جاڭالىقتار
اباي وبلىسىندا جۇرگىزۋشى اۋلادا ويناپ وتىرعان ءبىر توپ بالانى قاعىپ كەتتى: ءۇش ءبۇلدىرشىن مەرت بولدى
فوتو: Ru.freepik.com
19 تامىز كۇنى ساعات 16:00 شاماسىندا اباي وبلىسى بەستەرەك اۋىلىندا Toyota اۆتوكولىگىن تىزگىندەگەن جۇرگىزۋشى ءۇيدىڭ قاقپاسىنىڭ جانىندا, جول جيەگىنەن 10 مەتر قاشىقتىقتا تۇرعان ءبىر توپ بالانى قاعىپ كەتتى, دەپ جازدى qandastar.kz
قاتتى سوققى سالدارىنان ءۇش بالا كوز جۇمدى. بۇل تۋرالى Stan.kz اقپارات اگەنتتىگى حابارلايدى.
55 جاستاعى كولىك جۇرگىزۋشىسى رولگە يە بولا الماي قالعان. جول اپاتى سالدارىنان ەكى وقيعا ورنىندا بالا كوز جۇمعان. تاعى بىرەۋى اۋرۋحاناعا بارا جاتقان جولدا جان تاپسىردى. ۇش بالا ءتۇرلى جاراقاتتارمەن اۋرۋحاناعا جەتكىزىلدى.
بالالاردى قاعىپ كەتكەن جۇرگىزۋشى ۇستالىپ, قاماۋعا الىندى. مەديتسينالىق ساراپتاما ونىڭ جول-كولىك وقيعاسى كەزىندە ماس بولماعانىن كورسەتتى.
“وقيعا ورنىندا پوليتسيا قىزمەتكەرلەرى جۇمىس ىستەپ جاتىر. قايعىلى جاعدايدىڭ سەبەپتەرى مەن ءمان-جايىن انىقتاۋ ءۇشىن بارلىق قاجەتتى تەرگەۋ امالدارى جۇرگىزىلىپ جاتىر”, – دەپ مالىمدەدى ءۇرجار اۋداندىق پوليتسيا دەپارتامەنتى.
پرەزيدەنتتىڭ تاپسىرماسىمەن اباي وبلىسىنا قورعانىس مينيسترلىگىنىڭ ۇشاعى اتتاندى. ۇشاق بورتىندا رەانيماتولوگ, نەيروحيرۋرگ جانە تراۆماتولوگ دارىگەرلەر بار. دەنساۋلىق ساقتاۋ مينيسترلىگى زارداپ شەككەن بالالارعا مەديتسينالىق كومەك كورسەتۋ ءۇشىن ءۇرجار اۋدانىنا دارىگەرلەر مىنگەن س-295 اسكەري ۇشاعىنىڭ قونعانىن حابارلادى.
اباي وبلىسىنىڭ اكىمى بەرىك ءۋالي قازا تاپقان بالالاردىڭ وتباسىلارىنا قاجەتتى كومەك پەن قولداۋ كورسەتۋدى تاپسىردى.
“اكىمنىڭ تاپسىرماسى بويىنشا قازا بولعانداردىڭ وتباسىلارىنا جەرلەۋ ءراسىمىن ۇيىمداستىرۋدا بارلىق قاجەتتى قولداۋ, سونداي-اق پسيحولوگيالىق جانە ماتەريالدىق كومەك كورسەتىلەدى”, – دەلىنگەن حابارلامادا.
قازىر وقيعا ورنىندا وبلىس اكىمىنىڭ ورىنباسارىنىڭ ۇيلەستىرۋىمەن ارنايى توپ جۇمىس ىستەپ جاتىر. اكىمدىك جاعدايدىڭ ەرەكشە باقىلاۋدا ەكەنىن ايتتى.
