Abaı oblysynda jyldyq qýaty 300 myń tonna mys balqytatyn zaýyt salynady

Qazaqstan Respýblıkasynyń Premer-Mınıstri Oljas Bektenov jáne China Nonferrous Metal Mining Co. Ltd. Dırektorlar keńesiniń tóraǵasy Sı Chjenpın mys salasyndaǵy yntymaqtastyq máselelerin talqylady. 

Kezdesý nátıjesinde QR Premer-Mınıstri Oljas Bektenovtiń qatysýymen jyldyq qýaty 300 myń tonna bolatyn mys balqytý zaýytyn salý týraly kelisimge qol qoıyldy. Kelisimge tapsyrys berýshi retinde áreket etetin «Kaz Minerals Smelting» JShS, tehnologııalyq jabdyqty jobalaý jáne satyp alý qyzmetterin jetkizýshi kompanııa China Nonferrous Metal Industry’s Foreign Engineering and Construction Co., Ltd. (NFC), sondaı-aq qurylys jáne iske qosý-jóndeý jumystarynyń merdigeri «NFC Kazakhstan» JShS kompanııalary arasynda qol qoıyldy.

Zaýyt Abaı oblysyndaǵy Aqtoǵaı kentiniń mańynda salynady. Shıkizat kózi Bozshakól jáne Aqtoǵaı taý-ken baıytý keshenderiniń, «Shyǵystústimet» JShS baıytý fabrıkalarynyń mys konentraty bolmaq. Zaýyt qurylysynyń qorytyndysy boıynsha álemdegi eń iri mys kenishteriniń birin jáne qazirgi zamanǵy mys balqytý óndirisin biriktiretin klaster qurylatyn bolady. Aldyn ala quny $1,5 mlrd bolatyn jobanyń paıdalaný kezeńinde 1000-nan astam jańa jumys orny ashylady. Joba 2028 jyldyń sońyna deıin paıdalanýǵa beriledi.

Joǵary tehnologııalyq ónim shyǵaratyn kásiporyn respýblıkadaǵy eń iri óndiris ornyna aınalmaq. Mys balqytý óndirisi salasynda qoldanylatyn tehnologııalar álemdik ekologııalyq standarttarǵa sáıkes keledi.

Kásiporyn naryqtyń quramynda mys bar shıkizat pen katodty mys óńdeýge degen ishki qajettilikterin qamtamasyz etedi. Aıta ketý kerek, katodty mys elektr energetıkasynda, mashına jasaýda jáne basqa da ónerkásip salalarynda keńinen qoldanylady. Sonymen qatar jańa zaýyt tazartylǵan altyn, kúmis jáne kúkirt qyshqylyn shyǵarýdy josparlap otyr.

«Memleket basshysy ornyqty ekonomıkalyq ósim mindetin qoıdy. Jańa mys balqytý zaýytynyń qurylysy – elimizde óndiriletin mys shıkizatyn qaıta óńdeý kólemin arttyrýǵa múmkindik beretin jáne ekonomıkaǵa eleýli úles qosatyn iri ındýstrııalyq joba. Mys salasy bizdiń ónerkásiptiń basym sektorlarynyń biri jáne biz úshin onyń qarqyndy damýy óte mańyzdy», — dep atap ótti Oljas Bektenov.

Anyqtama: 

China Nonferrous Metal Industry’s Foreign Engineering and Construction Company Ltd («Non Ferrous China») – akııalary Shenchjen qor bırjasynda aınalymdaǵy, memleket baqylaıtyn kompanııa. Halyqaralyq jobalaý merdigerlerine jáne tústi metaldar resýrstaryn ázirleýge qatysady. NFS Qytaıdan tys jerlerde tústi metaldardy óndirý jáne óńdeý boıynsha taý-ken aktıvterine ınvestıııa salǵan alǵashqy Qytaı kompanııasy, sonymen qatar QHR-da taý-ken jobalaryna ıelik etedi. Álemniń 20-dan astam elinde iskerlik qyzmet júrgizedi. NFC Kaz Minerals-dyń Bozshakól, Aqtoǵaı jáne Bozymshaq jobalarynda jetekshi merdiger boldy.