اباي وبلىسىنىڭ شەنەۋنىكتەرى ارباداعى الەم چەمپيونىنا بوكال سىيلاعان

 فوتو: اشىق دەرەككوز

اباي وبلىسى جارما اۋدانى اتىنان شىققان پارا-ارمرەستلينگتەن جەتى دۇركىن الەم چەمپيونى زارينا پريماكقا جەرگىلىكتى بيلىك بوكال جيناعىن سىيلاعان. وڭىرگە قاراستى شار قالاسى «جاستار رەسۋرستىق» ورتالىعىنىڭ ديرەكتورى راۋان كاكىمجان ۇلى سپورتشىعا تارتۋ ەتەتىن باسقا ء«جونى دۇرىس» سىيلىق بولماعانىن العا تارتتى. الايدا شەنەۋنىكتەردىڭ سىيلىعى قازاقستاندىقتاردىڭ اشۋىن تۋعىزدى, – دەپ حابارلايدى qandastar.kz Stan.kz تىلشىسىنە سىلتەمە جاساپ.

زارينا پريماك جۋىردا مولدوۆانىڭ كيشينەۆ قالاسىندا وتكەن پارا-ارمرەستلينگ چەمپيوناتىندا جەڭىمپاز بولدى. چەمپيونعا سىيلىق تابىستالعانى تۋرالى اقپارات, ەڭ اۋەلى, جارما اۋدانى اكىمدىگىنىڭ Instagram-داعى پاراقشاسىندا جاريالاندى. الايدا بىرنەشە ۋاقىتتان كەيىن پوست وشىرىلگەن.

شار قالاسى «جاستار رەسۋرستىق» ورتالىعىنىڭ ديرەكتورى راۋان كاكىمجان ۇلى جاعدايدىڭ انىق-قانىعىن ايتىپ بەردى. سوزىنشە, سپورتشىنى قۇتتىقتاپ بارۋعا بوچچا جاتتىقتىرۋشىسىنىڭ وتىنىشىنەن كەيىن بارعان. سوندىقتان وزدەرىمەن ورتالىقتا بار سىيلىقتى اپارعان ەكەن.

«ورتالىعىمىزدىڭ اشىلعانىنا 1,5 جىلدان استى. كوپ كولەمدە بەرەتىن سىيلىعىمىز دا جوق. 26 تامىزدا كەنجەحان دەگەن ەر ادام بىزگە ءوزىن شار قالاسىنىڭ مۇگەدەكتەر قاۋىمداستىعىنىڭ مۇشەسىمىن جانە بوچچا ويىنىنىڭ باپكەرىمىن دەپ تانىستىردى. باپكەر سول كەزدە زارينانىڭ چەمپيون بولىپ كەلگەنىن ايتتى. بىراق وزىنەن بولەك تاعى باسقا جاندار قۇتتىقتاپ بارۋىن سۇرادى. ايتپەسە, زارينا پريماكتىڭ ءبىزدىڭ ورتالىققا قاتىسى جوق, قىزمەتكەرىمىز ەمەس. الايدا ورتالىق ۇيىمداستىرعان ءبىر جارىستا تورەشى بولعانىن ەسكە الىپ, ءوز تاراپىمىزدان «العىس حات» بەرۋدى ۇيعاردىق. ورتالىقتان اتىنان بەرىلەتىن سىيلىقتار ءتىزىمىن كورگەندە تەك دوپ, شاينەك, فەن, سكاكالكا جانە تاعى باسقا كىشىگىرىم زاتتار قالعان ەكەن. سىيلىق جاعىنان بىزدە نە بار دەيسىز. ونىڭ ىشىندە ەڭ ءتاۋىر دەگەنى وسى بوكال جيناعى بولدى. بىزدە بۇدان ارتىق ەشتەڭە جوق, بۇدان ارتىق ەشتەڭە بەرە المايمىز. سونى قولىما ۇستاپ الىپ, اسىعىس شىعىپ كەتتىك», – دەدى راۋان كاكىمجان ۇلى.

راۋان كاكىمجان ۇلىنىڭ ايتۋىنشا, ويىندا ارتىق ەشنارسە بولماعان. ول قۇتتىقتاۋعا اۋدان اكىمىنىڭ ورىنباسارى دا ىلەسە بارعانىن ايتتى.

«چەمپيوننىڭ ءۇيىنىڭ ماڭىنا كەلگەندە جارما اۋدانى اكىمىنىڭ ورىنباسارى ورتەنگەن ءۇيدىڭ جاعدايىن كورىپ, ارالاپ ءجۇر ەكەن. سەبەبى بىرنەشە كۇن بۇرىن ءبىر ۇيدە ءورت بولعان. ءسويتىپ اكىمدىكتەگىلەر بىرگە قوسىلىپ باردىق. ءبىز ەندى ءوزىمىزدىڭ سىيلىعىمىز بەن العىس حاتىمىزدى ۇسىندىق. سول جەردە العىس حاتتى وقىپ بەردىم, ورتاق فوتوعا تۇستىك. ارتىنشا مۇنى «شار قالاسىنىڭ ماسەلەلەرى» پاراقشاسىنىڭ بەلسەندىلەرى الەۋمەتتىك جەلىگە جاريالاپتى. جەلى قولدانۋشىلارى بۇل سىيلىقتى بۇكىل ءۇش ورگان بىرىگىپ اپاردى دەپ ويلاعان. بىراق ول بىزدىڭ, ياعني «جاستار رەسۋرستىق ورتالىعىنىڭ» اتىنان بەرىلگەن العىس حات پەن جەكە سىيلىعىمىز. ال بيۋدجەتتەن بولىنەتىن قاراجاتقا سپورتتىق جارىستارعا جانە ءتۇرلى ءىس-شارالارعا سىيلىقتاردى قوراپ-قوراپپەن الىپ قويامىز», – دەدى راۋان كاكىمجان ۇلى.

راۋان كاكىمجان ۇلىنان “ەڭ بولماسا گۇل سىيلامادىڭىزدار ما?” دەپ سۇرادىق. ول قالادا گۇلدى تەك مەرەكە كەزىندە اكەلەتىنىن جانە ونى ىزدەپ جۇرۋگە ۋاقىت جەتپەگەنىن اتاپ ءوتتى.

اتالعان جاعداي الەۋمەتتىك جەلىدە قىزۋ تالقىعا تۇسكەن. جەلى قولدانۋشىلارى سپورتشىعا بەرىلگەن سىيلىقتى سىناپ, ءتۇرلى پىكىر قالدىردى.

«ماسقارا, قازاقستاننىڭ نامىسىن قورعاپ, 2 التىن اكەلگەن قىزدىڭ قادىرى وسى بولعانى ما? ودان دا بەرمەي-اق قويعانى جاقسى ەدى», «كەيبىرەۋلەر ءۇشىن پاتەرلەر, اسفالت, ال مۇندا تەك بوكال جيناعى», «پارا-سپورت ءتۇرى ەمەستەرگە ءۇي, كولىكتىڭ ءتۇر-ءتۇرىن بەرىپ جاتىر, ءتىپتى, الەم چەمپيونى بولماسا دا. ال بۇل سپورت ءتۇرىنىڭ ايىرماشىلىعى نەدە?» – دەپ جازدى جەلى قولدانۋشىلارى.