Abaı oblysynyń sheneýnikteri arbadaǵy Álem chempıonyna bokal syılaǵan

 Foto: ashyq derekkóz

Abaı oblysy Jarma aýdany atynan shyqqan Para-armrestlıngten jeti dúrkin álem chempıony Zarına Prımakqa jergilikti bılik bokal jınaǵyn syılaǵan. О́ńirge qarasty Shar qalasy «Jastar resýrstyq» ortalyǵynyń dırektory Raýan Kákimjanuly sportshyǵa tartý etetin basqa «jóni durys» syılyq bolmaǵanyn alǵa tartty. Alaıda sheneýnikterdiń syılyǵy qazaqstandyqtardyń ashýyn týǵyzdy, – dep habarlaıdy qandastar.kz Stan.kz tilshisine silteme jasap.

Zarına Prımak jýyrda Moldovanyń Kıshınev qalasynda ótken Para-armrestlıng chempıonatynda jeńimpaz boldy. Chempıonǵa syılyq tabystalǵany týraly aqparat, eń áýeli, Jarma aýdany ákimdiginiń Instagram-daǵy paraqshasynda jarııalandy. Alaıda birneshe ýaqyttan keıin post óshirilgen.

Shar qalasy «Jastar resýrstyq» ortalyǵynyń dırektory Raýan Kákimjanuly jaǵdaıdyń anyq-qanyǵyn aıtyp berdi. Sózinshe, sportshyny quttyqtap barýǵa bochcha jattyqtyrýshysynyń ótinishinen keıin barǵan. Sondyqtan ózderimen ortalyqta bar syılyqty aparǵan eken.

«Ortalyǵymyzdyń ashylǵanyna 1,5 jyldan asty. Kóp kólemde beretin syılyǵymyz da joq. 26 tamyzda Kenjehan degen er adam bizge ózin Shar qalasynyń múgedekter qaýymdastyǵynyń múshesimin jáne bochcha oıynynyń bapkerimin dep tanystyrdy. Bapker sol kezde Zarınanyń chempıon bolyp kelgenin aıtty. Biraq ózinen bólek taǵy basqa jandar quttyqtap barýyn surady. Áıtpese, Zarına Prımaktyń bizdiń ortalyqqa qatysy joq, qyzmetkerimiz emes. Alaıda ortalyq uıymdastyrǵan bir jarysta tóreshi bolǵanyn eske alyp, óz tarapymyzdan «Alǵys hat» berýdi uıǵardyq. Ortalyqtan atynan beriletin syılyqtar tizimin kórgende tek dop, sháınek, fen, skakalka jáne taǵy basqa kishigirim zattar qalǵan eken. Syılyq jaǵynan bizde ne bar deısiz. Onyń ishinde eń táýir degeni osy bokal jınaǵy boldy. Bizde budan artyq eshteńe joq, budan artyq eshteńe bere almaımyz. Sony qolyma ustap alyp, asyǵys shyǵyp kettik», – dedi Raýan Kákimjanuly.

Raýan Kákimjanulynyń aıtýynsha, oıynda artyq eshnárse bolmaǵan. Ol quttyqtaýǵa aýdan ákiminiń orynbasary da ilese barǵanyn aıtty.

«Chempıonnyń úıiniń mańyna kelgende Jarma aýdany ákiminiń orynbasary órtengen úıdiń jaǵdaıyn kórip, aralap júr eken. Sebebi birneshe kún buryn bir úıde órt bolǵan. Sóıtip ákimdiktegiler birge qosylyp bardyq. Biz endi ózimizdiń syılyǵymyz ben alǵys hatymyzdy usyndyq. Sol jerde alǵys hatty oqyp berdim, ortaq fotoǵa tústik. Artynsha muny «Shar qalasynyń máseleleri» paraqshasynyń belsendileri áleýmettik jelige jarııalapty. Jeli qoldanýshylary bul syılyqty búkil úsh organ birigip apardy dep oılaǵan. Biraq ol bizdiń, ıaǵnı «Jastar resýrstyq ortalyǵynyń» atynan berilgen alǵys hat pen jeke syılyǵymyz. Al bıýdjetten bólinetin qarajatqa sporttyq jarystarǵa jáne túrli is-sharalarǵa syılyqtardy qorap-qorappen alyp qoıamyz», – dedi Raýan Kákimjanuly.

Raýan Kákimjanulynan “eń bolmasa gúl syılamadyńyzdar ma?” dep suradyq. Ol qalada gúldi tek mereke kezinde ákeletinin jáne ony izdep júrýge ýaqyt jetpegenin atap ótti.

Atalǵan jaǵdaı áleýmettik jelide qyzý talqyǵa túsken. Jeli qoldanýshylary sportshyǵa berilgen syılyqty synap, túrli pikir qaldyrdy.

«Masqara, Qazaqstannyń namysyn qorǵap, 2 altyn ákelgen qyzdyń qadiri osy bolǵany ma? Odan da bermeı-aq qoıǵany jaqsy edi», «Keıbireýler úshin páterler, asfalt, al munda tek bokal jınaǵy», «Para-sport túri emesterge úı, kóliktiń túr-túrin berip jatyr, tipti, álem chempıony bolmasa da. Al bul sport túriniń aıyrmashylyǵy nede?» – dep jazdy jeli qoldanýshylary.