«ابدەن قۇتىرعان, بەتى بۇلك ەتپەيدى»: جەلىدە اۋىل مۇعالىمىنىڭ ءسوزى قىزۋ تالقىعا ءتۇستى

فوتو: اشىق دەرەككوز

جەلىدە ماڭعىستاۋ وبلىسى تۇپقاراعان اۋدانى باۋتينو اۋىلىنداعى گوركي اتىنداعى مەكتەپ-ليتسەي مۇعالىمىنىڭ تۇسىرگەن ۆيدەوسى تارادى, دەپ حابارلايدى   qandastar.kz Skifnews.kz اقپارات پورتالىنا سىلتەمە جاساپ.

مۇعالىم وقۋشىسىنا ۇرىسىپ جاتقانىن قىزدىڭ اپكەسىنە ءوزى جىبەرگەن.

ۆيدەودا مۇعالىم وقۋشى قىزدان جەمپىرىن شەشۋدى تالاپ ەتەدى.

«بۇكىل سىنىپتىڭ الدىندا مەن مىنا جەمپىردى شەشۋىن تالاپ ەتەمىن. بولمە ىستىق. ال ول «توڭىپ تۇرمىن» دەيدى. بەتى بۇلك ەتپەي وتىرعانىن قاراشى! مەن ۇيالى تەلەفونىن تاپسىر دەدىم, ويتكەنى تەست بولىپ جاتىر, بىراق ول ونى ماعان بەرمەدى. تالاپتارىمدى ورىنداماعاندىقتان, ساباقتان شىعىپ, ۇيىنە قايتۋىن سۇرايمىن. ابدەن قۇتىرىپ كەتكەن! كابينەتتەن لاقتىرىپ جىبەرگىم كەلىپ تۇر», – دەدى مۇعالىم.

قىزدىڭ جاقىندارى مۇعالىمنىڭ سوزدەرى ەتيكاعا جات ەكەنىن جانە ۇستاز مارتەبەسىنە ساي كەلمەيتىنىن ايتىپ, ونى جازالاۋدى تالاپ ەتىپ وتىر. سوزدەرىنشە, مۇعالىم بىرنەشە جىلدان بەرى قىزدى قورلاپ كەلە جاتىر. جەلىدەگى پىكىرلەردەن مۇعالىمنىڭ 20 جىلدىق ەڭبەك ءوتىلى بار ەكەنىن كورۋگە بولادى.

وبلىستىق ءبىلىم باسقارماسىنىڭ مالىمدەۋىنشە, باۋتينو اۋىلىنىڭ مۇعالىمى تارتىپتىك جازاعا تارتىلدى.

«ماسەلە كوميسسيا وتىرىسىندا قارالدى. كوميسسيانىڭ شەشىمىمەن «پەداگوگيكالىق ادەپتىڭ كەيبىر ماسەلەلەرى تۋرالى» وقۋ-اعارتۋ مينيسترلىگىنىڭ 2020 جىلعى 11 مامىرداعى № 190 بۇيرىعىنا سايكەس, مۇعالىمتارتىپتىك جاۋاپكەرشىلىككە تارتىلدى. پەداگوگيكالىق ەتيكانىڭ نەگىزگى قاعيدالارىن بۇزعانى ءۇشىن «ەسكەرتۋ» بەرىلدى. وقۋشىنىڭ اتا-اناسى مەكتەپكە شاقىرىلدى, بىراق ولار كەلمەدى», – دەدى تۇپقاراعان اۋداندىق ءبىلىم ءبولىمىنىڭ باسشىسى ايبارشىن وتەسباەۆا.